Loading ...
Një tragjedi ka ndodhur këtë të enjte në SHBA, ku një avion biznesi me gjashtë persona në bord, i përdorur nga ekipet e NASCAR-it dhe kompani që bëjnë pjesë në listën e famshme “Fortune 500”, është rrëzuar në një aeroport në Karolinën e Veriut, ku ka shpërthyer në flakë.
Associated Press shkruan se avioni Cessna C550 ishte i regjistruar në një kompani të drejtuar nga ish-piloti i NASCAR, Greg Biffle.
Avioni u rrëzua gjatë uljes në Aeroportin Rajonal të Statesville, rreth 72 km në veri të Charlotte.
“Po, mund të konfirmoj se ka viktima,” tha sherifi i qarkut Iredell, Darren Campbell.
Lojtarët e golfit që po luanin pranë aeroportit u tronditën kur panë aksidentin, madje u shtrinë përtokë në klubin Lakewood ndërsa avioni kalonte sipër tyre. Gropa e nëntë u mbulua me mbeturina.
“Ne thamë: ‘Oh Zot! Është shumë poshtë,’” tha Joshua Green nga Mooresville. “Ishte e frikshme.”
Pamjet televizive treguan ekipet e emergjencës duke vrapuar në pistë mes flakëve dhe mbeturinave.
Hetimet po kryhen nga Bordi Kombëtar i Sigurisë së Transportit dhe Administrata Federale e Aviacionit. Në momentin e aksidentit kishte reshje të lehta dhe re.
Ky aksident shton numrin e ngjarjeve ajrore në SHBA gjatë vitit 2025, ku janë regjistruar mbi 1 mijë e 300 aksidente, ndërsa vitin e kaluar ishin regjistruar 1 mijë e 482.
