Kreu i KQZ-së, Ilirjan Celibashi deklaroi pas mbledhjes së grupimeve të dialogut politik për Reformën Zgjedhore se palët duken të angazhuara për realizimin e votës së emigrantëve. Në një deklaratë për mediat, Celibashi tha se ka propozuar që KQZ të administrojë këtë proces nëse realizohet.
Ai shtoi se votimi nga jashtë duhet të realizohet nëpërmjet internetit.
“Nëse nuk do të kemi rregullat për votimin nga jashtë brenda këtij sesioni të kuvendit, thuajse me siguri absolute votimi nga jashtë nuk mund të realizohet në 2025. Nga ajo që pashë në këtë format tavoline, duket që palët janë të angazhuara seriozisht. Nuk e di nëse do të prodhojnë rezultat, por duket që ka interes dhe vullnet për një zgjidhje në lidhje për këtë çështje duke e parë nga natyra e pyetjeve. Çështja e afatit ka rëndësinë e vet por ajo që propozova është që të jetë institucioni i KQZ, ai i cili administron kërkesat e atyre votuesve që duan të votojmë jashtë territorit. Gjithë këtë proces ta administrojë KQZ. Nëse do të konsiderohej ideja që propozoj, mendoj që votimi të kryhet ose nëpërmjet internetit ose në mënyrë tjetër elektronike. Nuk mendoj se është votimi me postë si zgjidhja më e mirë për rastin e Shqipërisë. Një ndër opsionet është ai i kombinuar ku fleta dërgohet në mënyrë elektronike. “, tha Celibashi./abcnews.al
