Julian Ahmataj e ka nisur mbarë me Tiranën, teksa bardheblutë mposhtën 0-3 Luftëtarin. Në Ballsh Teuta dhe Bylisi barazuan pa gola, duke bërë që tre ekipe të shkojnë në kuotën e 17 pikëve dhe të ndajnë kreun për momentin. Laçi ka gjetur ritmin, teksa ka mposhtur edhe Vllazninë me rezultatin 3-0. Gjithsesi kurbinasit mbetet në vendin e tetë, por tashmë me një diferencë tjetër me rivalët.
NDESHJET – Luftëtari dhe Tirana luajtën hapur dhe miqtë kanë realizuar dy herë me anë të Torassa-s dhe Ngoo-së, ndërkohë që në minutën e 26-të Batha sfumoi edhe një penallti, që u prit nga portieri Paiteris. Torassa në aksionin pasardhës shleu gabimin e shokut të skuadrës, ndërkohë që Prikas la me një lojtar më pak Luftëtarin. Në fund anglezi Ngoo shfrytëzoi pasimin e Halilit dhe realizoi golin e dytë. Pjesa e dytë e takimit solli edhe një gol tjetër, të shënuar në fund nga Edon Hasani. Me rezultatin e 0-3 Tirana u rikthye te fitorja.
Në Laç vendasit e kërkojnë më shumë golin, por Vllaznia mbrohet mirë dhe zbret disa herë rrezikshëm. Kurbinasit, në rastin e parë shënuan me të zakonshmin Nëabueze. I njëjti lojtar shënoi një tjetër gol mjaft të bukur me fillimin e pjesës së dytë deh shkodranët pësuan një shok. Goli i tretë erdhi nga Lushkja, i cili shmangu dy lojtarë në zonë dhe më pas edhe portierin Sherri. Vllaznia kishte pretendime për një pozicion jashtë loje të Tecos në aksionin e golit. Cungu, duke parë rezultatin, vendosi të nxjerrë nga fushë Nëabueze dhe Xhixhën. Malçi, për kurbinasit mund të shënonte edhge golin e katërt, por Sherri nuk ia lejoi. Shkodranët kthehen me këmbë në tokë pas kësaj humbjeje.
Bylisi mundohet shumë me Teutën të realizojë, në një ndeshje të hapur dhe me raste. Vendasit ishin më lart deri në minutën e 72-të, por portieri Frashëri nuk lejoi prekjen e rrjetës në portën e tij. Pasi Peposhi u ndëshkua me karton të kuq, durrsakët nisën të shihnin më shumë nga porta e Bylisit. Vecaj dhe Khalid ishin të rrezikshëm, por Hidi i ndali të dy sulmuesit. Arapi në të 86′ provoi nga distanca, por topi u ndal në traversë. Todorovski mori karton të kuq në shtesë dhe deri në fund rezultati mbeti i pandryshuar, me skuadrat që ndanë nga një pikë.
KATEGORIA SUPERIORE – JAVA 10
E diel, më 27 tetor, ora 13:00
Luftëtari-Tirana 0-3
Shënues: Torassa 27′, Ngoo 45′, Hasani 89′
Bylis-Teuta 0-0
Laçi-Vllaznia 3-0
Shënues: Nwabueze 39′, 52′, Lushkja 60′
/abcnews.al
