Marcelo Brozovic, mesfushori kroat i Interit, ka dalë sot në konferencë për shtyp dhe ka folur për ndeshjen e nesërme kundër Borussia Dortmund në “San Siro”. Futbollisti zikaltër e thotë hapur që kërkojnë të fitojnë, ndërkohë që thotë se ky është Interi më i fortë që nga koha që i është bashkuar.
“Ky, Interi më i fortë? Sigurisht, kanë ardhur lojtarë me eksperiencë. Jemi të fortë, por duhet të punojmë që ta tregojmë diçka të tillë. Na pret një ndeshje e rëndësishme. Luajnë në shtëpinë tonë dhe duam të fitojmë”, tha Brozovic fillimisht.
Kundër Borussias mungon Stefano Sensi dhe kroati thekson se loja e tij do të jetë e njëjtë, por nga ana tjetër e pranon se pa italianin do të jetë më e vështirë. “Nuk ndryshon loja ime edhe pa Sensin. Sigurisht pa të do të jetë më e vështirë, pasi është një lojtar i shkëlqyer. Gjithsesi do të bëjmë një ndeshje të madhe”.
Brozovic më tej tregon se është rritur me kalimin e viteve:”Kam qenë më i ri më parë, tani shume gjëra kanë ndryshuar. Jam bërë edhe baba dhe tani i shoh ndryshe situata të ndryshme. Kam punuar mirë, jam këtu. Trajneri më thotë çfarë do dhe unë jam gjithmonë i gatshëm”.
Sigurisht kroati ka edhe gjëra për të rregulluar dhe e pranon: “Më duhet të përmirësoj fazën mbrojtëse. Duhet të jem më i kujdesshëm, ma thotë shpesh trajneri, të jem një ekran. Mund të bëj më shumë në këtë aspekt. Ndoshta humbas disa pasime shumë të thjeshta dhe më duhet të jem më i përqendruar. Më pëlqen të luaj topin dhe të jem mbështetës për shokët e skuadrës”. /abcnews.al
