Mbrëmjen e nesërme do të nisë faza gjysmë-finale e kompeticionit më të rëndësishëm evropian për klube, UEFA Champions League, me “galaktikët” e Real Madrid që do të presin në “aktin e parë”, në mitikun “Santiago Bernabeu”, “qytetarët” e Manchester City.
Të shumtë kanë qenë legjendat e futbollit botëror që kanë dhënë mendimin e tyre mbi këtë përballje, teksa ditën e sotme një gjë të tillë e ka bërë dhe ish-“bomberi” i Manchester United dhe Kombëtares së Anglisë, i cili çuditërish beson te një triumf i “rivalëve” historikë të “djajve”, Manchester City.
“Manchester City jo vetëm që do të mundë Real Madrid-in në gjysmëfinalen e Champions League, por do t’i thyejë ata.
Natyrisht që mund të gaboj, por mendoj se City është në një nivel tjetër. Nuk mund të heqësh dorë kurrë nga një skuadër me përvojën dhe historinë e Real Madrid, por unë nuk do të vë bast për ta. Mendoj se ky është viti i City-t”,- tha Rooney në prag të një ndër ndeshjeve më emocionuese të këtij sezoni futbollistik. /i.m /abcnews.al
