Së bashku me tanket dhe burrat, duket se lufta e Rusisë në Ukrainë ka shkatërruar një tjetër burim të saj – fuqinë punëtore. Këtë muaj agjencia shtetërore ruse e lajmeve TASS zbuloi se numri i punëtorëve nën 35 vjeç është në nivelin më të ulët të tregut të punës që nga fillimi i viteve 1990, me rënien më të ndjeshme në vitin 2022 mes atyre të moshës 25 dhe 29 vjeç.
Shkaku i kësaj rënieje është i lehtë për t’u konstatuar, “operacioni special ushtarak”.
Putini ka marrë të rinjtë nga zyrat dhe fabrikat e tyre dhe i ka vendosur në vijën e parë të frontit. Kremlini tani po kërkon 400,000 rekrutë të tjerë përmes ashpërsimit të ligjeve të rekrutimit dhe një fushate propagandistike që u kërkon të rinjve të regjistrohen.
Përveç viktimave të luftës të Rusisë, TASS u ankua për humbjen e “specialistëve të rinj”. Deri në një milion qytetarë rusë, kryesisht të rinj, janë larguar nga vendi për të shmangur ushtrinë ose në shenjë proteste ndaj luftës, zakonisht nga radhët e profesionistëve me arsim të lartë.
Mbi 10% e fuqisë punëtore të teknologjisë u larguan në vitin 2022, ndërsa bizneset janë goditur më tej nga një eksod i punëtorëve emigrantë të frikësuar se do të përfshihen në operacionin ushtarak të Rusisë, raporton abcnews.al.
Në përgjithësi, ekonomisti Vladimir Gimpelson vlerëson se emigracioni dhe mobilizimi i kushtuan fuqisë punëtore ruse afërsisht 2% të punëtorëve meshkuj të moshës 20-49 vjeç vitin e kaluar.
Humbja e punëtorëve të kualifikuar mund të rritet falë veprimeve të qeverisë ruse. Një projekt-ligj për të rritur moshën e rekrutimit nga 18-27 në 21-30, si dhe oficerët e rekrutimit që u bëjnë presion studentëve për t’u bashkuar në luftë do të thotë që të diplomuarit mund të dalin nga klasa dhe drejt në vijën e zjarrit.
Pra, çfarë do të thotë kjo fuqi punëtore në rënie për Rusinë?
Lidhur me pasojat ekonomike, CEO i konsulentëve strategjikë Macro Advisory Chris Weafer tha për Newsweek se mungesat e punës dhe aftësive do të jenë “po aq të dëmshme për perspektivat e rritjes ekonomike të ardhshme të Rusisë sa sanksionet ndaj teknologjisë”.
Raporti i vendeve të lira të punës u rrit gjatë vitit 2022 nga 2.1 në tremujorin e parë në 2.5 në tremujorin e fundit, ndërsa gjysma e bizneseve u ankuan për mungesë të stafit vitin e kaluar.
Një ekonomi e ngadaltë e kombinuar me punëdhënësit që përpiqen të joshin punëtorët me paga më të larta rrezikon të nxisë inflacionin dhe, në dhjetor, guvernatorja e Bankës Qendrore Elvira Nabiullina paralajmëroi se “kapaciteti për të zgjeruar prodhimin në ekonominë ruse është kryesisht i kufizuar nga kushtet e tregut të punës”.
Mënyra se si është kryer mobilizimi do të thotë se ka mungesë të fuqisë punëtore në sektorë kritikë si për ekonominë ashtu edhe për luftën.
Këtë javë, banka qendrore e Rusisë zbuloi se numri i punonjësve të disponueshëm ishte në nivelin më të ulët që nga viti 1998, me mungesa më të përhapura në sektorët e dominuar nga meshkujt si prodhimi, ndërmarrjet industriale, furnizimi me ujë, miniera, transporti dhe magazinimi, të cilat të gjitha ka të ngjarë të ndikojnë te prodhimi vendas.
Për më tepër, 390,000 burra janë bërë pjesë e ushtrisë duke braktisur sektorë si ndërtimi, përpunimi dhe shitja me pakicë. Rusia ka vuajtur gjatë gjithë kohës nga mungesa e municioneve, duke e bërë edhe më të rëndësishme praninë e një force punëtore dhe ekspertë të aftë në sektorin teknologjik, raporton abcnews.al.
Megjithëse industria e mbrojtjes po punëson civilë, ata nuk kanë gjasa të kenë përvojën e nevojshme dhe njohuritë e specializuara të nevojshme për të qenë menjëherë produktiv.
Nga ana e tyre, ndërmarrjet e sektorit privat po përpiqen të plotësojnë role tradicionalisht të dominuara nga meshkujt, duke punësuar gra, adoleshente dhe të moshuar.
Perëndimi iu kundërpërgjigj luftës së Rusisë në Ukrainë duke miratuar një paketë sanksionesh për të dobësuar ekonominë.
Megjithatë, duket se vetë lufta po i shkakton dëme më të mëdha vendit që e nisi.
/abcnews.al
