Cesc Fabregas e përshkroi vendimin e tij për t’u transferuar nga Arsenali te Barcelona në verën e vitit 2011.
“Unë them gjithmonë se ky ishte vendimi më i vështirë i jetës sime. Për zemrën time ishte e lehtë sepse gjithmonë kam dashur të luaj për ekipin e parë të Barcelonës. Ishte qyteti im, e kaluara ime, ëndrra që kisha që kur isha fëmijë të luaja për Barçën. Por në të vërtetë ishte shumë shumë e vështirë sepse Arsenali më kishte dhënë kaq shumë, ndjeva kaq shumë dashuri nga të gjithë, klubi, bota, të gjithë. Besimi që më dhanë që në moshë kaq të re ishte vërtet unik. Ishte tepër e vështirë të flisja me Arsene Wengerin, njeriun që më dha gjithçka, dhe t’i tregoja atij se doja të kthehesha te Barcelona”.
“Në kontratën që kam nënshkruar me Barcelonën, kishte një klauzolë që thoshte nëse largohem, Arsenali do të ketë fjalën e parë dhe të fundit për nënshkrimin tim. Kur ishte e qartë që do të largohesha nga Barcelona, trokita në derën e Arsenalit dhe për rreth një javë më thanë se do ta shqyrtonin këtë çështje. Më në fund, kontaktova me Wengerin dhe ai më tha se skuadra ka shumë lojtarë të mëdhenj në pozicionin tim si Mesut Ozil dhe për të më përdorur mua ai do të duhej të merrte kohë që do të ndryshonte ekuilibrin e ekipit. Për të qenë i sinqertë, mendoj se ai u lëndua nga mënyra se si u largova”.
Për transferimin e tij te Chelsea dhe Jose Mourinho:
“Në atë kohë unë kisha disa opsione dhe një prej tyre ishte Chelsea. Fola me Mourinhon, e takova dhe ajo që më tha më bëri të ndihesha shumë mirë, më tha se donte që unë të jem lider i ekipit të tij dhe ndjeva se ishte zgjidhja më e mirë për mua”.
Fabregas aktualisht luan për Como në Serie B. /G.D abcnews.al/
