Moti i keq në Spanjë ka shkaktuar një viktimë ndërsa përmbytjet kanë shkaktuar dëme të konsiderueshme në shumë qytete të vendit. Në disa zona ka pasur dhe ndërprerje të energjisë elektrike.
Trupi i pajetë i një personi të tërhequr nga uji në automjetin e tij u gjet në një zonë të Navarës në Spanjë ku reshjet e dendura shkaktuan përmbytje dhe dëme të mëdha në shumë qytete të vendit. Përmbytjet detyruan autoritetet të mbyllin për trafikun disa rrugë kryesore; gjithashtu ka pasur dhe ndërprerje të energjisë elektrike në zona të ndryshme të vendit. Banorët e Tafalas dolën të pastrojnë rrugën nga balta pasi reshjet përmbytën qytezën.
E gjithë zona e Navaras pësoi përmbytje të papritura si pasojë e daljes nga shtrati të dy lumenjve. Autoritetet vendore deklaruan se një nga bashkitë më të prekura nga përmbytjet ishte ende e paarritshme për shkak të baltës në rrugë. Në Pamplonë dhe gara e demave në kuadër të festës së Shën Firminos u ndërpre si pasojë e kushteve atmosferike./ABC News Albania 24/7
