Moska ka zbehur shpresat për një takim mes presidentëve Trump dhe Putin në Osaka të Japonisë. Kremlini ka deklaruar se propozimi i Shtëpisë së Bardhë nuk është pasuar nga asgjë konkrete, ndaj dhe ideja “vazhdon të vërtitet në ajër”.
Zyra e shtypit në Kremlin deklaroi të martën se ideja amerikane për një takim mes presidentëve Trump dhe Putin në kuadër të samitit G20 që zhvillohet më vonë gjatë muajit në Japoni ka mbetur pezull dhe me detajet të pacaktuara.
Trump e kapi në befasi Kremlinin muajin e kaluar kur tha se kishte në plan të takohej me Putin në samitin e Osakës, por pavarësisht befasisë Moska u shpreh e hapur për një takim të tillë dhe shpresoi se do të ndodhte.
Rusia prej kohësh ka shprehur gatishmërinë e saj për të riparuar marrëdhëniet me Shtetet e Bashkuara, që mbeten të vështira për shkak të një sërë çështjesh, përfshirë këtu Sirinë, Ukrainën dhe ndërhyrjen e përfolur ruse në politikën amerikane. Por Kremlini e ka bërë gjithashtu të qartë se pret të marrë një propozim zyrtar për këtë takim dhe u ka kujtuar mediave se, takimi i fundit i planifikuar mes Putin dhe Trump u anulua me nismë të palës amerikane.
Zyrtari i Kremlinit, Juri Ushakov u tha gazetarëve ditën e martë se detajet e një takimi mes dy liderëve jo vetëm që nuk janë caktuar, por as janë diskutuar.
“Ideja për një takim Putin-Trump në Osaka, në kuadër të samitit G20, vërtitet në ajër. Pala amerikane, që e ka hedhur atë, nuk ka sjellë asgjë të përgatitur dhe ne nuk kemi diskutuar as elementët bazë, që janë vendi, koha dhe axhenda”, deklaroi Ushakov./ABC News Albania 24/7
