Loading ...
Kamioni i cili po transportonte gruri e ardhur nga Ukraina, është përmbysur në autostradën Tiranë-Durrës.
Sipas policisë drejtuesi i kamionit A.A, ka humbur kontrollin e mjetit duke bërë që të dalë nga rruga e për pasojë të derdhej i gjithë gruri që po transportonte.
Por ajo që vihet re në videon e siguruar në Abcnews.al, shihet se si mjetet e tjera që kalojnë në rrugë nuk e kanë aspak problem që të “shkelin” mbi grurin e derdhur, edhe pse çdo ditë ankohemi për rritjen e çmimit të miellit dhe nënprodukteve të tij.
Ajo që bën edhe më shumë përshtypje është që forcat e policisë të cilat kanë për detyrë ruajtjen e sigurisë rrugore, por jo vetëm, në vend që të ngrinin postobllok dhe të ndalonin mjetet e tjera të kalonin mbi grurë, i kalojnë edhe vetë me mjetin e tyre.
Njoftimi i policisë:
Më datë 12.08.2022, rreth orës 14:05, në autostradën Durrës-Tiranë, shtetasi A. A., duke drejtuar mjetin (kamion të ngarkuar me grurë), dyshohet se ka humbur kontrollin mbi drejtimin e mjetit dhe për pasojë mjeti ka dalë nga rruga. Si pasojë e aksidentit janë shkaktuar vetëm dëme materiale. Grupi hetimor ndodhet në vendngjarje dhe po punon për sqarimin e rrethanave të aksidentit.
Kujtojmë se dy ditë më parë anija me grurin ukrainas u ankorua në portin e Durrësit.
Anija “Jaohar Ranim” u furnizua me grurë në portin Izmai të Ukrainës disa ditë më parë, në bazë të marrëveshjes të arritur nëpërmjet Rusisë dhe Ukrainës, për të lejuar eksportimin e stokut të grurit të bllokuar nëpër depo për shkak të luftës.
Në Ukrainë ka ende tenoleta grurë të bllokuar, që pritet të shpërndahen në të gjithë globin.
/Abcnews.al/
