EMRAT/ Në krye Berisha, deputetët e PD që nuk firmosën platformën e bashkimit

Enkelejd Alibeaj prezantoi sot zhvillimet më të fundit në lidhje me platformën për bashkimin e PD-së, e cila sipas tij është firmosur nga 31 deputetë të Grupit Parlamentar demokrat, përfshi edhe Lulzim Bashën. Platforma përmban gjashtë pika, ku fillimisht kërkohet heqja dorë nga gjuha e urrejtjes ndaj çdokujt në parti.

Pika e dytë parashikon zhbërjen e vendimit të 12 janarit ku u përjashtuan mbështetësit e Berishës nga Grupi Parlamentar.

Në pikën e tretë thuhet se anulohet çdo proces i njëanshëm riorganizimi apo ngritje të strukturave lokale të partisë, apo mbledhje të strukturave qendrore të partisë, duke e shtyrë në një kohë të përshtatshme që përcaktohet në përputhje me rregullat e caktuara në këtë dokument.

Si pikë të katërt demokratët shohin detyrimin që Grupi Parlamentar i cili ngre një grupi pune të përbashkët për hartimin dhe ndjekjen e zbatimit të planit të detajuar për realizimin e bashkimit të partisë (nga baza në qendër). Së pesti Grupi i Punës i ngritur nga Grupi Parlamentar përcakton strukturat zbatuese të këtij plani ribashkimi.

Në fund, në draftin e propozuar nga Alibeaj thuhet se Grupi Parlamentar ngre grupe pune për nisjen e një fushate ndërgjegjësuese në bazë me qëllim bashkimin mes demokratëve, si dhe përgatitjen e partisë për zgjedhjet e ardhshme lokale.

Por, krahas firmëtarëve, nuk ishin të pakët ata deputetë të PD që nuk firmosën. Të tillë janë Ervin Salianji, Grida Duma, Tomor Alizoti, Isuf Çela, Ina Zhupa, Tritan Shehu, Flamur Noka, Emond Spaho, Luan Baçi, Luçiano Boçi, Albana Vokshi, etj., duke mos përjashtuar edhe Berishën.

Një pjesë e mbështetësve të Berishës nuk janë pjesë e Grupit Parlamentar të PD-së, megjithatë janë deputetë të zgjedhur nën siglën e kësaj partie dhe pjesë e procesit të bashkimit.

Nuk firmosën:

1.SALI BERISHA

2.BELIND KËLLICI

3.EDMOND SPAHO

4.GRIDA DUMA

5.ERVIN SALIANJI

6.INA ZHUPA

7.ISUF ÇELA

8.TOMOR ALIZOTI

9.TRITAN SHEHU

10.FLAMUR NOKA

11.LUAN BAÇI