Tirana do të luajë me Kukësin në “Arena Egnatia” ditën e nesërme në orën 13:45. Një sfidë shumë e vështirë për të dyja skuadrat të cilat do të kërkojnë 3 pikët në këtë takim, me bardheblutë që kërkojnë marshimin drejt titullit kampion.
Në konferencën për shtyp trajneri Orges Shehi, analizoi përballjen me verilindorët, ku tekniku i kryeqytetasve theskoi se pauza i ka shërbyer skuadrës për të rikuperuar energjitë.
Mendoni se pauza e kombëtareve ka qene pozitive apo negative?- Ndërprerja e kampionatit ishte e parashikuar për shkak të pauzës së kombëtareve. Kur ka grumbullim Kombëtarja sigurisht që kontigjenti nuk është i plotë, ishin 4 lojtarë të thirrur, 2 me ekipin A dhe 2 me U-21, të cilët kanë ardhur duke i’u bashkuar skuadrës ditën e mërkurë. Ndërprerja e kampionatit është normale, në momentin që ishim do të donim që kampionati të mos kishte ndaluar, por kjo javë na ka shërbyer për të rikuperuar energjitë dhe për tu përgatitur për ndeshjen e nesërme.
Ndeshja ndaj Kukësit? – Sfida me Kukësin është e vështirë. Të gjitha skuadrat janë me objektiva. Kukësi renditet e treta në klasifikim, është një ekip që është rivale për sa i përket ndërtimit të skuadrës dhe cilësisë, pavarësisht se pikët dhe pritshmëritë nuk i kanë aty ku ata donin. Një ndeshje që ka rëndësi sepse vjen pas pauzës së kombëtareve.
Oshilacionet e Kukësit do ta bëjnë disi më të lehtë përballjen me të?- Nuk mendoj. Të gjitha skuadrat që luajnë me ekipet që janë afër njëra-tjetrës kërkojnë që të japin maksimumin e tyre, kanë dhe objektivat e tyre. Kampionati i gjatë ka dhe momente jo pozitive, siç mund t’i ketë pasur Kukësi, por edhe ne gjithashtu. Ndeshja në ndeshje ndryshon. Ndryshon strategjia, motivimi dhe psikologjia e lojtarëve, kam përshtypje që nesër na pret një ndeshje e luftuar dhe me cilësi.
Statistikat? – Për pikët ne kemi një vazhdimësi të mirë, një ekuilibër në të treja fazat. Nesër mbaron faza e tretë. Për çdo fazë kemi mundur të marrim nga 20 pikë, ndërsa tani në fazën e tretë jemi me 19 për momentin. Kërkojmë gjithmonë që mos të kemi limite, të përmirësohemi. Duam vazhdimësi, sepse statistikat janë gjë tjetër, por e rëndësishme është për ne që ndeshje pas ndeshje të grumbullojmë sa më shumë pikë.
Objektivat? Keni në dorë fatet e Europës dhe te rënies ne fundin e tabelës… – I kemi fatet tona në dorë, pavarësisht se kemi distancë nga kundërshtari ynë më i afërt. Ne do të luajmë si gjithmonë për të marrë maksimumin dhe kështu do të bëjmë edhe nesër. Kemi objektivat tona, kemi dhe lojtarë që kanë objektiva personale dhe kolektive dhe kur ndërthuren të dyja së bashku janë akoma edhe më mirë, Ne duhet te shohim punën tonë?
Në këtë pikë kë konsideron Tirana si rival në këtë kampionat? – Me këtë distancë të konsiderueshme që kemi, rivali ynë i vetëm jemi ne. Në këtë moment që jemi, motivimi është shumë i rëndësishëm. Rivali i vetëm i Tiranës është Tirana ndaj ne nuk duhet të kemi limite. /f.a/abcnews.al
