Mesditën e së enjtes, Milan Radojçiç i është arratisur Policisë së Kosovës në pikën kufitare në Bërnjak.
Policia në raportin 24 orësh ka dhënë detaje se si i iku Radojçiq nga duart, raporton Express
Derisa zyrtarët policorë ishin duke kryer procedurat e verifikimit, Radojçiç është kthyer mbrapa me veturë, në drejtim të Serbisë.
Sipas verifikimit të kryer nga policia, ka rezultuar se Radojçiç është i kërkuar në bazë të urdhërarrestit të lëshuar nga Gjykata.
“PKK Bërnjak 03.02.2022 – 15:40. Një i dyshuar mashkull/Serb (në hyrje në Kosovë), gjersa zyrtarët policor ishin duke e verifikuar, i njëjti me veturë është larguar mbrapa në drejtim të Serbisë. Bazuar në verifikimin e kryer i dyshuari është i kërkuar në bazë të urdhër arrestit të lëshuar nga gjykata”, ka bërë të ditur policia në raportin 24 orësh.
Ndaj Radojçiç është hapur rasti “Pengim i personit zyrtar në kryerje të detyrës”.
Radojçiç është vënë në listën e të kërkuarve para disa ditëve.
Radojçiç ishte shpallur në kërkim për rastin e vrasjes së Oliver Ivanoviçit. I njëjti pas një kohe ishte fshirë nga lista e kërkimit me vendim të prokurorit që po e hetonte çështjen. Pas një kohe Prokuroria Speciale sërish e ka vendosur në listën e personave të kërkuar.
Para disa javëve, SHBA e sanksionoi atë dhe disa zyrtarë të tjerë të Listës Serbe./GazetaExpress/
