Nga Ajgena Korbi
Kurba e të infektuarve me COVID ka vijuar rënien dhe gjatë dhjetorit, por duket se nuk do të vazhdojë këtë tendencë pas festave. “Omicron” varianti tepër i transmetueshëm i koronavirusit po qarkullon në vend dhe ekspertët e shëndetit publik kanë paralajmëruar rritje të të prekurve në janar dhe shkurt.
Aktualisht rreth 5200 persona sipas Ministrisë së Shëndetësisë rezultojnë pozitiv në të gjithë vendin. Rreth 2 mijë më pak se në tetor dhe nëntor. Tirana vijon të mbajë peshën kryesore me gati gjysmën e të infektuarve. Ndiqet nga Fieri, Durrësi dhe Shkodra. Qarqet e vetme ku numri I të infektuarve ka mbetur me dy shifra janë Dibra dhe Kukësi me përkatësisht 76 dhe 82 të prekur.
Të njëjtën tendencë rënëse kanë ndjekur dhe të shtruarit në spital ku mjekët thonë se 30% e pacientëve I përkasin moshës nga 19 në 45 vjeç. 48 pacientë më pak se në fund të nëntorit raporton Ministria e Shëndetësisë në dy spitalet COVID në Tiranë. Ndërsa të sëmurët në gjendje të rëndë kanë pësuar një rritje të lehtë. Në terapi intensive aktualisht po trajtohen tre pacientë më shumë.
Me ulje po mbyllet muaji dhe sa i përket humbjeve të jetës prej Covid 19. 98 viktima ka shënuar virusi përgjatë dhjetorit nga 172 humbje jete që u regjistruan në nëntor.
Në janar të gjithë pacientët me COVID që kanë nevojë për ndihmë të specializuar do të marrin shërbim vetëm tek ish kirurgjitë pasi Infektivi do ti nënshtrohet rindërtimit.
Në varësi të rasteve Ministria e Shëndetësisë ka paralajmëruar se do të aktivizojë dhe skenarë të tjerë.
QARQET ME MË SHUMË TË INFEKTUAR
Tiranë 2381 persona
Fier 579 persona
Durrës 397 persona
Shkodër 349 persona
QARQET ME MË PAK TË INFEKTUAR
Dibër 76 persona
Kukës 82 persona
TË SHTRUARIT NË SPITAL
30 Nëntor 169 pacientë 15 terapi intensive
24 Dhjetor 121 pacientë 18 terapi intensive
HUMBJE JETE NGA COVID 19
Nëntor 172 vdekje
Dhjetor 98 vdekje
/abcnews.al
