Policia lokale e Vlorës e ndihmuar edhe nga FNSH-ja e Fierit kanë blinduar qytetin bregdetar pas atentatit që ndodhi pasditen e sotme në lagjen “10 Korriku” ku mbeti i plagosur rëndë nga shpërthimi me eksploziv 33-vjeçari Indrit Sadedini. Gazetari i “ABC”-së Elton Nikaj raporton se janë shoqëruar 6 persona të cilët po merren në pyetje ndërkohë që lënda plasëse e llojit tritol që shpërtheu dyshohet të këtë qenë rreth 400 gr.
Kamerat e sigurisë kanë kapur momentin e shpërthimit të tritolit, por jo vetëm. Eksplozivi ka shpërthyer pasi i riu parkoi makinën dhe po dilte nga garazhi. Bomba me telekomandë ishte vendosur pranë hyrjes së garazhit dhe ishte mbuluar me një karton që të mos dallohej.
Pista e vetme në tryezën e hetuesve për momentin është e kaluara e vlonjatit jashtë vendit ku ka jetuar për disa kohë. Nga sa mësohet i riu nuk ka qenë i dënuar por ka disa precedentë të mëparshëm për shkak të përfshirjes në disa konflikte me persona të tjerë. Ky është atentati i dytë që i bëhet./ Abcnews.al
