Zëvendësndihmës Sekretari Amerikan i Shtetit për Çështjet e Evropës dhe Euroazisë Metju Palmer ka mbërritur në Tiranë në një klimë të tensionuar politike.
Agjendën e takimeve me zyrtarët e lartë shqiptarë zyrtari amerikan e ka nisur me Kryeministrin Edi Rama. Bashkëbisedimin me të shefi i qeverisë përmes një komenti në Twitter e ka cilësuar të frytshëm.
Për rreth 1 orë e 40 minuta ai ka zhvilluar një takim me Kryeministrin Edi Rama. Ndërkohë që zhvillohej takimi, në Kryeministri u panë të hyjnë disa ministra të qeverisë Rama, të cilët besohet se janë bërë pjesë e takimit Rama-Palmer.
Temë e takimit, sikurse informoi vetë kryeministri Rama nëpërmjet rrjetit social Twitter, ishin marrëdhëniet dypalëshe, situate politike në vend, por edhe dialogu serbi-Kosovë.
“Marrëdhëniet e shkëlqyera bilaterale, integrimi evropian i Shqipërisë, dialogu Kosovë-Serbi dhe situata politike në vend, në një bashkëbisedim të frytshëm që na gjeti në dakordësi të plotë me zv/Ndihmës Sekretarin e Shtetit, Mathew Palmer”, shkruan Rama.
Mesditën e nesërme Palmer do të takohet me kryetarin e Partisë Demokratike Lulzim Basha dhe kryetaren e Lëvizjes Socialiste për Integrim Monika Kryemadhi. Ndërsa më pas, pritet që zyrtari i larte amerikan te takohet në Presidence me kreun e shtetit Ilir Meta.
Në agjendën e tij, Zëvendësndihmës Sekretari Amerikan i Shtetit, Metju Palmer ka planifikuar dhe një takim me një grup gazetarësh.
Palmer vjen në Shqipëri në kuadër të një turi në Ballkan ndërkohë që e gjen vendin tonë në një situatë të tensionuar politike.
Opozita mban më 13 Prill protestën e radhës. Kryeministri Rama është shprehur kategorik kundër kërkesës së opozitës për qeveri tranzitore, duke theksuar se zgjedhjet parlamentare do të mbahen në vitin 2021./abcnews.al
