Vllaznia kryeson kampionatin pas tetë javësh, ndërkohë që në Shkodër ka shumë optimizëm. Lojërat e mira janë ato që i bindin se mund ta tentojnë titullin kampion. Kuqeblutë, me trajnerin Thomas Brdaric në stol, kanë treguar nivel të lartë fizik.
Veç kësaj ka edhe fantazi, që e ofron braziliani Victor Da Silva. Sponsori Alban Xhaferi është ndjerë mirë kur e shikonte Vllazninë të bënte presing edhe në minutat e fundit kundër Partizanit. Gjithashtu nuk munguan edhe pasimet e dominimi.
Nisur nga këto, ai në rrjetet sociale shkruan “Futboll ‘samba’ i miksuar me stil gjerman”. E gjithë e shoqëruar me një video të minutave të fundit të ndeshjes. Pas triumfit me Partizanin, Xhaferi kishte folur edhe për objektivin titull.
“Që në fillim ne kemi dhënë disa objektiva minimalë, por absolutisht. Vllaznia në çdo sezon hyn për titullin kampion. Oreksi për vjen duke ngrënë kanë thënë. Të shohim, le të ecim përpara”, u shpreh Xhaferi për mediat pas ndeshjes së të dielës. /abcnews.al
