Loading ...
Ndeshje spektakolare mes Monaco dhe PSG në Ligue 1. Pesë gola të shënuar, nga një penallti për çdo skuadër, dy gola të anuluar nga VAR-i, karton i kuq dhe përmbysje e çmendur e vendasve, nga 0-2 në 3-2
Goli i parë erdhi në minutën e 25-të. Kylian Mbappe mori një pasim nga Di Maria, “dogji” mbrojtësin kundërshtar në garën e shpejtësisë dhe mposhti italianin Mannone me një goditje të saktë.
? FINAL WHISTLE! #ASMPSG
What a comeback by @AS_Monaco_EN! pic.twitter.com/8E7mt2cTjI
— Ligue1 English (@Ligue1_ENG) November 20, 2020
Ylli i sulmit të PSG-së dyfishoi shifrat 12 minuta më vonë. Penallti për miqtë dhe Mbappe nuk gaboi nga pika e bardhë, duke gjetur golin e nëntë në kampionat për këtë sezon.
Kampionët e Francës nuk ndaluan sulmet e tyre, Moise Kean dhe Mbappe dërguan topin në rrjetë, por teknologjia VAR i anuloi dy golat, me pjesën e parë që u mbyll 0-2.
Në fraksionin e dytë të sfidës ndodhi edhe përmbysja e madhe. Kevin Volland gjeti golin e shpresës në minutën e 52-të. Sulmuesi gjerman nuk u ndal dhe realizoi sërish në minutën e 65-të.
Ekipi nga Principata mori zemër dhe u hodh në kërkim të fitores. Minuta e 84-t solli një penallti për Monacon, karton të kuq për Diallo të PSG-së dhe Cesc Fabregas nuk gaboi përballë Keylor Navas.
Mbetja me dhjetë lojtarë vështirësoi gjithçka për djemtë e Tuchel, koha në dispozicion ishte e paktë dhe Monaco ia doli të siguronte tre pikë fantastike, duke u ngjitur në vend të dytë me 20 pikë, 4 më pak se kampionët në fuqi. /abcnews.al
