Loading ...
Një 7-vjeçare humbi jetën ditën e djeshme në Kosovë, pas kryerjes së një rezonance magnetike në një klinikë private. Pas përkeqësimit të gjendjes, e mitura është dërguar në QKUK, por fatkeqësisht nuk ka mundur të mbijetojë. Dyshohet se vdekja e 7-vjeçares ka ardhur si shkak i mbidozës së anestezisë, ndërkohë që policia ka bërë me dije se rasti në fjalë po hetohet, ndërsa janë marrë në pyetje tre dëshmitarë.
“Prishtinë 04.08.2020 – 10:30. Është raportuar se viktima femër kosovare (e mitur) dyshohet se ka ndërruar jetë gjatë një ekzaminimi. Me urdhër të prokurorit trupi i pajetë është dërguar për obduksion, ndërsa tre dëshmitarë meshkuj kosovarë janë intervistuar dhe janë liruar në procedurë të rregullt. Rasti është duke u hetuar”, thuhet në raport.
Ndërkohë, mjeku i klinikës ku po trajtohej e mitura, Arben Kutllovci, është shprehur se vetë familja e të ndjerës kishte kërkuar që rezonanca magnetike të bëhej me anestezion.
“Zakonisht doza e anestezionit llogaritet në bazë të peshës trupore të pacientit… E keqja është që pacientja ka ndërruar jetë por sa na përket neve, ne jemi krejtësisht të pastër në këtë punë. Janë disa gjëra që garancione 100% nuk të jep askush. Unë këtë paciente e kam trajtuar edhe më herët. Këta edhe më herët kanë ardhur dhe i kanë kryer ekzaminimet. Kësaj radhe kanë kërkuar që të përdoret edhe anestezioni. Anesteziologët kanë ardhur por unë nuk kam qenë fare aty”, deklaroi Arben Kutllovci. /abcnews.al/
