Kryeministri Edi Rama u bëri sërish thirrje emigrantëve shqiptarë të votojnë në zgjedhjet e 11 majit numrin 5, për Partinë Socialiste.
Rama u shpreh se të gjithë shqiptarët më 11 maj duhet të bëjnë histori dhe t’i tregojnë Europës se duan të bëhen pjesë e Bashkimit Europian.
Gjithashtu kryeministri nuk i kurseu kritikat edhe për opozitën, ndërsa referuar ish-kryeministrit Sali Berisha, Rama tha se është peshqesh nga diktatura.
“Janë një mijë vajza dhe djem që punojnë për negociatat. Vota më 11 maj është takim me historinë. Më 15 maj BE vjen në Tiranë. Në datën 16 vjen edhe sekretari i Përgjithshëm i NATO-s. Imagjinoni çfarë mesazhi ka më 11 maj, ku shqiptarët i çojnë një mesazh të qartë Europës që ne më 11 maj duam të hyjmë në BE,. Imagjinoni ju që Europa dhe NATO bashkëbisedon me bufin e kënetës. Se jemi edhe në Athinë. Bufi kishte dalë një dite edhe shprehej se jam krenar dhe për nder të jem buf, sepse ka qenë simbol i urtësisë dhe bukurisë sepse i duket vetja dhe i bukur atij se ju e dini vetë se sa superseksi që është. Por problemi është që nuk bëhet fjalë për të njëjtin buf. Ky bufi ynë është ai për të cilin populli thotë ç’më rri akoma o buf kënete. Ai bufi ynë mbretëron në një llum që ka penguar shqiptarët për kaq shumë vite. Atë bufin në Tiranë e kem peshqesh nga diktatura komuniste”, tha Rama.
Po ashtu Rama tha se me pasaportën e BE, doganat do të marrin fund. Gjatë këtij takimi kryeministri u ndal edhe tek reformat në drejtësi.
Rama u shpreh se si asnjëherë më parë, pandëshkueshmëria ka marrë fund dhe se ishte Partia Socialiste që i dorëzoi drejtësisë, “shpatën e drejtësisë”.
“Ne jemi të vetmit garant që ajo shpatë të mbetet në duart e drejtësisë. Shpata e drejtësisë na goditi, por jemi krenarë dhe se barazia para ligjit dhe liria individuale nuk mund të diskutohet. Bufin e dëgjojmë të thotë që do të shkrijë SPAK-un. Këneta premton shkrirjen e SPAK. Dhe tjetra Altin Dumani aty ka qenë, por nuk kishte shpatën sepse e mbanin ata që ishin në zyrën e kryeministrit. E mbante ai që e përdori për të futur në burg Fatos Nanon. Sot të gjithë e çojmë punën e SPAK, por u bë falë mbështetjes tonë. Dhe nëse ne bashkojmë flamurin kuqezi me flamurin e Europës, nuk e prek dot më asnjë buf kënete. Dhe në fund dua t’u them se sot në Shqipëri do të gjejnë paga më të mira edhe në ndërtim edhe në turizëm. Dy sektorë që ka shumë shqiptarë që punojnë këtu dhe nga ana tjetër edhe nëse nuk mendoni që të ktheheni, dhe keni një tok të trashëguar në cilindo fshat investoni për të ndërtuar atje diçka nga eksperiencat e fituara në Greqi sepse i keni dhënë aq shumë këtij vendi, ndaj shikojini këto mundësi. Kemi bërë një ligj të ri që do hyjë në fuqi pas zgjedhjeve”, tha ndër të tjera kryeministri Rama.
/abcnews.al/
