Loading ...
Administrata amerikane ka njoftuar Izraelin se do të dërgojë dhjetëra avionë të tjerë furnizues me karburant, ndërsa shtohen shqetësimet për një zgjerim të mundshëm të operacioneve ushtarake kundër Iranit.
Sipas tre zyrtarëve amerikanë dhe izraelitë, kjo lëvizje vjen në një kohë kur presidenti Donald Trump po shqyrton disa skenarë ushtarakë për një ofensivë më të gjerë ndaj Iranit. Planet janë diskutuar gjatë një takimi të zhvilluar në Shtëpinë e Bardhë.
Ndër opsionet që po shqyrtohen përfshihen sulme ndaj infrastrukturës iraniane, goditje të tjera ndaj objekteve bërthamore, si dhe sulme ndaj një kompleksi nëntokësor që dyshohet se përdoret për qëllime ushtarake.
Burimet bëjnë të ditur se Trump ende nuk ka marrë një vendim përfundimtar, por nuk përjashtohet mundësia që ai të urdhërojë një përshkallëzim të operacioneve në ditët në vijim.
Ndërkohë, tensionet mes Shteteve të Bashkuara, Izraelit dhe Iranit vazhdojnë të rriten. Ushtria amerikane ka ndërmarrë sulme ndaj objektivave iraniane në zonën e Ngushticës së Hormuzit dhe përgjatë bregdetit jugor të Iranit, ndërsa Teherani ka intensifikuar sulmet ndaj bazave amerikane në disa vende të rajonit.
Nga ana tjetër, kryeministri izraelit Benjamin Netanyahu ka paralajmëruar se çdo sulm i Iranit ndaj Izraelit do të marrë një kundërpërgjigje edhe më të fortë.
