Në Qafëzez asgjë nuk ka ndryshuar nga ditët e para të qershorit, kur lëkundjet sizmike dëmtuan pjesën më të madhe të shtëpive. Tre muaj më pas, shumë nga banorët e prekur nga tërmeti ende e kalojnë natën në çadra.
Shtëpia e Zarife Karafilit është ndër më të dëmtuarat e fshatit Qafëzez nga tërmeti i tre muajve më parë.
Tetë pjesëtarët e familjes jetojnë në çadrën e vendosur në oborrin e shtëpisë. Aty i kaluan edhe çastet e vështira të ndarjes nga jeta të kryefamiljarit dhe ceremoninë e mortit.
Ajo thotë se është në pritje të komisionit për dëmet.
Asgjë nuk ka ndryshuar edhe për të prekurit e tjerë nga lëkundjet sizmike në këtë zonë.
Shtëpitë janë të pabanueshme dhe muret mezi mbahen, por pamundësia për t’u strehuar diku tjetër, ka mposhtur frikën e të rriturve dhe fëmijëve.
Disa banorë ankohen se u kanë munguar edhe çadrat.
Shumica e familjeve të Qafëzezit kanë pak të ardhura dhe nuk mund të përballojnë vetë riparimin e shtëpive. Ata që kishin mundësi,ja kanë nisur punës. /ABC News Albania 24/7
