Loading ...Kryeministri Edi Rama mori pjesë në aktivitetin “Future Hospitality Forum 2026”, ku foli për potencialin e Shqipërisë në sektorin e turizmit, investimet dhe përfshirjen e markave ndërkombëtare.
Gjatë fjalës së tij, Rama theksoi se potenciali i jashtëzakonshëm i Shqipërisë duhet të takohet me investimet dhe markat ndërkombëtare, duke nënvizuar se kjo përbën një nga ambiciet kryesore për zhvillimin e mëtejshëm të turizmit shqiptar.
Gjithashtu theksoi se turistët janë bërë ambasadorët më të mirë për Shqipërinë.
“Ka brende të tjera që janë jashtë dhe nuk janë ende këtu. Dhe ne synojmë që të bëhen pjesë. Por gjithashtu ka shumë rëndësi se çfarë njerëzit përjetojnë si eksperiencë. Dhe duhet të bëjmë çmos për të shembur atë mur që ka ndarë Shqipërinë nga mendimet apo gjykimet e gabuara. Turistët janë bërë ambasadorët më të mirë të Shqipërisë. Shqipëria është një vend ku mikpritja është organike dhe këtë ata e kanë treguar”, tha ai.
Pjesë nga fjala e kryeministrit Edi Rama:
E di se disa prej këtyre markave janë tashmë aktive. Disa ndoshta ende po e mendojnë, por ka të tjera që nuk janë ende këtu. Kjo është ajo që duam të bëjmë. Dhe ajo që kam mësuar gjatë këtij rrugëtimi është se çfarëdo që të thuash ka rëndësi, por deri në njëfarë pike.
Më shumë rëndësi ka ajo që njerëzit shohin dhe përjetojnë. Dhe, në këtë drejtim, këta miliona e miliona turistë kanë qenë forca që na ka ndihmuar më shumë për të këputur zinxhirin e stereotipeve, për ta çarë e çarë e çarë murin që ndante Shqipërinë nga pjesa tjetër e Europës dhe që ishte ngritur përgjatë shumë viteve nga paragjykimet, gjykimet e gabuara dhe gjykimet e pamatura.
Kështu, këta turistë janë bërë ambasadorët tanë më të mirë dhe miqtë më të mirë të Shqipërisë. Ata kanë ndihmuar që të vijnë më shumë njerëz, sepse, kur janë kthyer në vendet e tyre, kanë dëshmuar se Shqipëria nuk është vendi ku duhet të jesh i lumtur nëse të grabisin dhe nuk të përdhunojnë, por është vendi ku mikpritja është e natyrshme, ku dielli shkëlqen shumë më bukur se në Bruksel, ku ushqimi është shumë më i mirë se në shumë vende të Europës dhe çka është më e rëndësishmja, ku si natyra, ashtu edhe njerëzit, janë ende aty për të të përqafuar. Sigurisht, e dimë se kemi probleme. Sigurisht, e dimë se ende kemi vështirësi. Kush nuk ka? Por e dimë gjithashtu se jemi në rrugën e duhur dhe tani po përballemi me një sfidë të re.
Po përballemi me sfidën e frikës për të menduar më në përmasa të mëdha dhe për të ëndërruar më në përmasa të mëdha, për të qëndruar pa dyshime dhe pa u dridhur kur investime të mëdha janë gati të vijnë, kur miliarda e miliarda janë gati të investohen në Shqipëri për ta shndërruar këtë vend në diçka edhe më ndryshe nga ç’është sot, por këto janë sfidat e përparimit.
Këto janë sfidat e ndryshimit dhe ne jemi këtu për t’u përballur me to, sepse e vetmja gjë dhe gjëja që dimë të bëjmë më mirë është të luftojmë. Unë do të vazhdoj të luftoj. Do të vazhdoj të qëndroj në mbrojtje të vendit dhe të së ardhmes. Dhe do të bëjmë më mirë edhe për t’i kuptuar ata që kanë frikë nga e ardhmja, por, me përkufizim, kushdo që është këtu sot nuk ka frikë nga e ardhmja. Është këtu pikërisht për ta përqafuar të ardhmen, në një mënyrë apo në një tjetër.
