Shkrihet B.O.S, këto janë forcat e reja elitë të Ushtrisë Shqiptare

schedule14:09 - 4 Mars, 2021

schedule 14:09 - 4 Mars, 2021

Regjimenti i Operacioneve Speciale është prezantuar si struktura më e re dhe më elitare e Forcave të Armatosura të Republikës së Shqipërisë.

Regjimentinë fjalë u ngrit pas bashkimit të Batalionit të Operacioneve Speciale dhe Forcave Komando, ndërsa komandanti i parë i tij u emërua kolonel Arben Zani.

I pranishëm në ceremoni ishte ministri i Mbrojtjes Niko Peleshi, i cili shoqërohej nga shefi i Shtabit të Përgjithshëm të FA, gjeneralmajor Bajram Begaj.

Peleshi vlerësoi kontributin shumëvjeçar të dy batalioneve tashmë të bashkuar, si dhe i siguroi efektivët e tyre se do të kenë vëmendjen e Ministrisë së Mbrojtjes dhe Shtabit të Përgjithshëm për të rritur më tej kapacitetet operacionale.

“Ky regjiment, pavarësisht se bëhet njësia me moshën më të re në Forcat e Armatosura, në të vërtetë ka dy formacionet tona ushtarake më të mirënjohura, më të vlerësuara dhe me një bilanc angazhimesh, kontributesh suksesesh që na bëjnë të gjithëve krenarë. Ju jeni krenaria dhe dinjiteti i Forcave të Armatosura në detyrimet dhe angazhimet tona jashtë vendit, duke filluar nga misionet në Irak, Afganistan dhe deri në Kosovë.

Si ministër i Mbrojtjes, e ndjej për detyrë t’ju inkurajoj dhe t’ju mbështes për ta konsoliduar më tej imazhin tuaj të mirë, kapacitetet operacionale dhe rolin tuaj, nën emrin e ri të regjimentit.

Si një strukturë e re, Regjimenti i Operacioneve Speciale do të jetë në prioritetet tona për plotësimin me personel, por edhe për modernizimin e teknikës dhe armatimit luftarak, për të mundësuar arritjen e standardeve dhe objektivave të caktuara.

Unë ju siguroj se veçanërisht regjimentit tuaj, por edhe Forca Tokësore e Forcat e Armatosura do të ketë një vëmendje të shtuar për mbështetje, përmirësime cilësore dhe motivime të tjera domethënëse.”- u shpreh ministri i Mbrojtjes. /abcnews.al