Aleksandër Petanaj, 25 vjeç u plagos mbrëmjen e djeshme me thikë si pasojë e një konflikti të ndodhur në qytetin e Vlorës. 25-vjeçari kishte marrë disa plagë në trup.
Gazetari Elton Nika tha për “ABC News” se një nga plagët e marra afër zemrës ka sjellë edhe vdekjen e të riut.
Gjithashtu burime nga Policia konfirmojnë se mes 25-vjeçarit dhe personit tjetër ka pasur konflikte më herët duke shkaktuar edhe konfliktin e ndodhur një natë më parë.
Ndërkohë Policia ka identifikuar dhe arrestuar autorin, 15 vjeç, banues në Vlorë. I plagosuri ishte shoqëruar në spital nga një shok i tij. Konfrontimi mes palëve raportohet se ka ndodhur në lagjen “24 Maji” Vlorë, pranë vendit të quajtur “Ish-ushqimores”.
Lexo edhe: 25-vjeçari u qëllua me thikë për vdekje, policia arreston autorin
Vlorë/ Informacion
Policia zbardh dhe dokumenton ngjarjen e ndodhur në orët e mbrëmjes së djeshme.
Më datë 18.06.2020, rreth orës 22:50, në Spitalin Rajonal Vlorë ka shkuar i dëmtuar nga një mjet prerës, shtetasi A. P., 25 vjeç, banues në Vlorë, i cili ka ndërruar jetë pak orë më vonë.
Menjëherë pas ngjarjes, Policia nisi hetimet për zbardhjen dhe dokumentimin e saj dhe falë veprimeve të shpejta, hetimore dhe profesionale u bë identifikimi në kohë rekord, kapja dhe prangosja e autorit, shtetasit G. T., 15 vjeç, banues në Vlorë.
Nga hetimet e kryera dyshohet se ngjarja ka ndodhur në lagjen “24 Maji” Vlorë, pranë vendit të quajtur “Ish-ushqimores”, ku pas një konflikti për motive të dobëta, shtetasi G. T. ka goditur me mjet prerës (thikë) shtetasin A. P., i cili ndërroi jetë rreth 4 orë më vonë në ambientet e spitalit.
Grupi hetimor po kryen veprimet e mëtejshme në lidhje me ngjarjen e ndodhur.
