Loading ...Policia e Shkodrës vuri në pranga Klevin Thepi dhe Doronesto Kullën dhe procedoi penalisht pesë të mitur, katër 17-vjeçarë dhe një 16 vjeçar. Shkak u bë konflikti që përfundoi me plagosjen me thikë të dy 17-vjeçarëve dhe lëndimin e një personi tjetër me sende të forta në lagjen “Kongresi I Përmetit” një ditë më parë.
Një prej 17-vjeçarëve gjatë kontrollit fizik policia thotë se i gjeti një sasi lënde të dyshuar narkotike, kanabis, e cila iu sekuestrua në cilësinë e provës materiale.
Adoleshentët u përfshinë në një sherr masiv paraditen e të premtes pranë shkollës së mesme “Shejnaze Juka” në Shkodër në një kohë kur ata duhet të ishin në mësim.
Pamjet e kamerave të sigurisë tregojnë se sherri ka nisur fillimisht me përplasje të dhunshme fizike e më pas është përshkallëzuar me përdorimin e thikës.
Dy vëllezërit e plagosur u transportuan në spital dhe ndodhen jashtë rrezikut për jetën.
Policia thotë se adoleshentët janë konfliktuar për motive të dobëta dhe bashkë me prokurorinë po punon për dokumentimin e plotë të rastit.
Kjo ngjarje në Shkodër vjen pak ditë pas ngjarjes së rëndë në Durrës ku një 15 vjeçar humbi jetën pas goditjes me thikë nga një bashkëmoshatar.
