Presidenti i Republikës Ilir Meta ka bërë ditën e sotme homazhe tek shtatorja e Atit të Pavarësisë së Shqipërisë dhe themeluesit të shtetit tonë modern, Ismail Qemali, ne bulevardin “Dëshmoret e Kombit”.
Pas homazheve, kreu i shtetit ka folur edhe për gazetarët për ngjarjet më të rëndësishme politike në vend. Presidenti u bëri thirrje qytetarëve që në zgjedhjet e pjesshme lokale të tregojnë forcën e tyre në demokraci me anë të votës.
Ndër të tjera, Meta u pyet nga gazetarët edhe për recitimin që bëri së fundmi në Korçë ndërsa në qytetin juglindor kishte nisur bora.
Lexo edhe: “Lumja ti moj Korçë lule”, Meta reciton në mes të dëborës
Kreu i shëtit tha se u frymëzua nga reshjet e dëborës që mungojnë në kryeqytet por edhe nga artistët e Korçës si dhe historia e qytetit. Megjithatë, shtoi Meta, vargjet patriotike që ai recitoi mund të kenë shqetësuar ata që ai i quajti “çunat e shoqatës së Ballkanit të Hapur.”
“Të shkosh në Korçë, të rrish me artistë të jashtëzakonshëm, të përjetosh momentin që kur ti shkon nis edhe dëbora që na mungon aq shumë.. Duheshin marrë masa të mos mbylleshin shkollat. E kuptoj që çunat e shoqatës së Ballkanit të Hapur, janë të shqetësuar nga përmbajtja e vargjeve që recitova që i dedikohen një akti patriotik si hapja e shkollës së parë shqipe në Korçë… Janë të lirë të vazhdojnë me poezi të Ballkanit të Hapur. Unë nuk jam kaq kozmopolit. Unë jam i angazhuar në dashurinë për atdheun.”
Ndërsa, i pyetur nëse presidenti do të jetë i angazhuar në këto zgjedhje të pjesshme, Meta tha se ndryshe nga rrethanat e zgjedhjeve të 25 prillit , sot janë disa deputetë që janë të angazhuar për të përmbushur misionin e opozitarizmit.
“Në çdo rast ka shumë të tillë që do të bëjnë detyrën e tyre. Presim për çeljen e negociatave me BE. Brenda 6 muajve, këto zgjedhje janë një mundësi për të lënë pas shkrirjen e shtetit me partinë.” /abcnews.al/
