Presidenti Begaj pret në takim zyrtarin indonezian: Kemi vullnet për nxitjen e mëtejshme të marrëdhënieve

schedule13:50 - 28 Shtator, 2022

schedule 13:50 - 28 Shtator, 2022

Presidenti Bajram Begaj ka pritur sot në një takim Zëvendëskryetarin e Asamblesë Konsultative të Republikës së Indonezisë, Dr. Muhammad Hidayat Nur Wahid.

Gjatë takimit Begaj vlerësoi ndër të tjera kontributin e Indonezisë si mbajtëse e Presidencës së G20 gjatë këtij viti.

“Presidenti i Republikës, Sh. T. Z. Bajram Begaj priti sot Zëvendëskryetarin e Asamblesë Konsultative të Republikës së Indonezisë, Dr. Muhammad Hidayat Nur Wahid.

Presidenti Begaj përshëndeti kontributin që Indonezia po jep në arenën ndërkombëtare si mbajtëse për herë të parë, gjatë këtij viti, të Presidencës së G20 dhe vlerësoi rolin në hartimin e axhendës së këtij forumi për përballimin e efekteve të pandemisë së Covid-19, si dhe të pasojave ekonomike e të sigurisë ushqimore në nivel global, pas agresionit rus në Ukrainë.

Duke u ndalur në marrëdhëniet dypalëshe, Presidenti i Republikës evidentoi dëshirën dhe vullnetin e institucioneve shqiptare për nxitjen e mëtejshëm të këtyre marrëdhënieve, si dhe nënvizoi rolin e rëndësishëm që parlamentet e të dy vendeve, pavarësisht distancës së madhe gjeografike, mund të luajnë për nxitjen e mëtejshme të shkëmbimeve politike, ekonomike, tregtare e kulturore.

Presidenti Begaj vlerësoi bashkëpunimin dhe koordinimin e mirë në kuadër të OKB-së dhe duke kërkuar mbështetjen e Asamblesë Konsultative për rishikimin e qëndrimit të Indonezisë dhe njohjen e pavarësisë së Kosovës, nënvizoi se në këtë mënyrë do t’i bëhej një shërbim i madh konsolidimit të paqes në rajonin e Ballkanit Perëndimor”, njofton Presidenca. /abcnews.al