Loading ...
Kryeministri Edi Rama ka reaguar lidhur me vendimin e Gjykatës Administrative për rritjen e pagave, duke e cilësuar situatën si “tejet turbulluese”.
Në një reagim të tij, Rama shkruan se, nëse Gjykata Administrative do të kishte të njëjtin standard dhe shpejtësi për çdo qytetar apo institucion në hall, shqiptarët do ta vlerësonin një gjë të tillë.
Kryeministri komentoi edhe kërkesën e Gjykatës Administrative për fondet nga thesari i shtetit, duke theksuar se, sipas tij, vendimmarrja për këtë çështje duhet të kalojë përmes Kuvendit të Shqipërisë.
“Sikur Gjykata Administrative të kishte standard për çdo qytetar apo institucion në hall, shpejtësinë e skëterrës me të cilën paska vepruar sot për të hapur dyert e thesarit për rritjen e rrogave të veta pa miratimin e parlamentit, unë besoj se çdo shqiptar i punësuar do ishte gati t’ia falte një gjysëm rroge vrapuesve fluturakë të Gjykatës Administrative…
Por të marrësh sa hap e mbyll sytë masën e parë të sigurisë në historinë e botës, jo për të ndaluar po për të nxitur për interesin vetjak ekzekutimin e një akti që me gjasë cënon ligjin dhe interesin publik, ndërkohë që mijëra e mijëra dosje hallesh presin me vite në sirtarët e gjykatës në fjalë, kjo është diçka tejet turbulluese! Ja edhe në tabelën bashkëngjitur çfarë kërkon Gjykata Administrative në dyert e thesarit të shtetit pa kaluar fare nga parlamenti, ndërkohë që e përsëris: Dyert e thesarit të shtetit i hap vetëm pushteti i pavarur legjislativ dhe Kuvendi i Shqipërisë do të bëjë detyrën e tij për këtë temë, në respekt të vendimit të Gjykatës Kushtetuese, ditën e enjte 17 shtator.”
/ abcnews.al /
