Loading ...Socialistët i dhanë dritën jeshile në Komisionin e Ligjeve një paketë ndryshimesh në Kodin Penal, që përfshijnë nga ashpërsimi i dënimeve për trafikun e narkotikëve, pastrimin e parave, dënimet për krimet seksuale ndaj të miturve apo mbrojtjen e interesave financiare të Bashkimit Evropian.
Sipas ministrit të Drejtësisë Besfort Lamallari, këto ndryshime janë në përmbushje të angazhimeve që burojnë nga integrimi i Shqipërisë në Bashkimin Evropian.
“Projektligji përafron plotësisht legjislacionin penal shqiptar me shtatë instrumente kyçe të Bashkimit Evropian, që lidhen me: – luftën kundër pastrimit të parave, – trafikimit të drogës, – trafikimit të qenieve njerëzore, -abuzimit dhe shfrytëzimit seksual të fëmijëve, – terrorizmit, – si dhe mbrojtjen e interesave financiare dhe sigurisë së Bashkimit Evropian”, tha Lamallari.
Ndryshimet parashikojnë heqjen nga Kodi Penal të veprës së shpifjes për gazetarët dhe forcimin e mbrojtjes së tyre.
“Projektligji vendos një ekuilibër të drejtë mes mbrojtjes së reputacionit dhe lirisë së shprehjes, duke përjashtuar përgjegjësinë penale për gazetarët që veprojnë me mirëbesim dhe në interes publik, ndërkohë që ashpërson ndëshkimet për dhunën apo kërcënimin ndaj tyre për shkak të detyrës”, shtoi ministri i Drejtësisë.
Dënime më të ashpra do të ketë edhe për ndërtimet pa leje, zënien e paligjshme të tokave, zjarrvënien apo edhe drejtuesit e automjeteve për parkim të dyfishtë.
“Projektligji ndërhyn edhe në një fenomen të përditshëm, por me pasoja serioze për sigurinë publike: parkimin në rresht të dytë, duke e trajtuar si vepër penale në rastet kur pengon seriozisht qarkullimin dhe lëvizjen e mjeteve të emergjencës”, u shpreh Lamallari.
Për miratimin e ndryshimeve në Kodin Penal duhen 84 vota, por mazhoranca i ka numrat, ndaj në parlament nuk i duhet konsensusi i opozitës.
