Loading ...
Ministri i Jashtëm i Gjermanisë, Johann Vandeful, i ka bërë sërish thirrje Iranit që të heqë dorë nga programi i tij i raketave balistike, duke paralajmëruar se situata po bëhet gjithnjë e më urgjente.
Gjatë një konference të përbashkët për shtyp në Berlin me homologun izraelit, Gideon Saar, ai theksoi se Teherani nuk duhet të mbivlerësojë pozicionin e tij në arenën ndërkombëtare.
“Si Gjermania ashtu edhe Izraeli ndajnë plotësisht interesa të përbashkëta sigurie dhe është gjithnjë e më e domosdoshme që Irani të pranojë ofertën për negociata”, u shpreh Vandeful.
Ai nënvizoi se në dritën e zhvillimeve të fundit, përfshirë konfliktin në Ukrainë dhe tensionet me Iranin, marrëdhëniet mes Gjermanisë dhe Izraelit po hyjnë në një fazë të re bashkëpunimi strategjik në fushën e sigurisë.
Sipas tij, këto kriza kanë afruar më shumë dy vendet dhe kanë forcuar koordinimin e tyre.
