Sistemi rrugor në Shqipëri është në gjendje shumë të vështirë. Është ky konstatimi i Konfindustrisë e cila në njoftimin për shtyp sjell një përmbledhje të situatës së rrugëve në jug-lindje të vendit.
Dy zona të rëndësishme të Shqipërisë pothuajse janë të shkëputura nga pjesa tjetër e vendit. Shqetësimi i Konfindustrisë është për rrugën Korçë-Përmet ku duke iu referuar të dhënave tëardhura nga bizneset e zonës, qarkullimi i mjeteve pothuajse është ndalur.
Pasojat janë të rënda për ekonominë, turizmin, bizneset dhe mirëqënien e qytetarëve-raporton konfindustria në njoftimin për shtyp.
Më konkretisht 30 km në rrugën kombëtare 3 Urat–Përmet duke filluar nga pika kufitare hyrese me Greqinë janë të shkatërruara në pjesë të shumta të saj duke u shndrruar në rrezik edhe për sigurinë e jetës –shkruan Konfindustria sipas së cilës shkëmbimet tregtare, turizmi, lëvizjet e biznesit dhe qytetarëve në këtë rrugë dhe me Greqinë janë praktikisht të ndalura.
Për qeverinë aksi rrugor Tri Urat deri në Përmet është në axhendën e investimeve që duhet të realizohen në mandatin e dytë qeverisë. Ky është një projekt i përbashkët me delegacionin Europian./abcnews.al
