Shtetet e Bashkuara do t’i bëjnë presion vendeve të NATO-s, sidomos Gjermanisë, që të rrisin shpenzimet ushtarake për shkak të shqetësimit rus. Lajmin e ka bërë të ditur një zyrtar i Departamentit të Shtetit, në prag të samitit të vendeve të Aleancës ushtarake, të premten në Bruksel.
“Kurrë më parë që prej Luftës së Ftohtë, roli i NATO-s ka qenë kaq i rëndësishëm. Ne e shohim këtë rëndësi në prizmin e agresionit rus”, ka thënë zyrtari amerikan në kushte anonimati.
Ai ka akuzuar qeverinë ruse se është në gjendje të kërcënojë, destabilizojë e madje të pushtojë fqinjët e saj, sikurse ka bërë në Ukrainë, Gjeorgji dhe Siri. Takimi i së premtes i paraprin atij që do të mbahet në Korrik, ku do të jenë të pranishëm krerët e shteteve anëtare./abcnews.al
