Hahn: Jo kampe refugjatësh në Ballkan

Komisioneri i BE për Zgjerimin, Johannes Hahn ka kundërshtuar idenë e qeverisë austriake për ngritjen e kampeve të refugjatëve në Ballkan. Në një prononcim për mediat, Hahn ka deklaruar se vendet e Europës që nuk janë pjesë e BE-së nuk mund të kthehen në parkingje për refugjatët. Hahn ka thënë se, përsa kohë vendet e Unionit nuk kanë një ligj të përbashkët për azilin, ngritja e kampeve të tilla nuk ka kuptim. Komisioneri ka nënvizuar se ide të ngjashme i ka kundërshtuar që në vitin 2015, kur kriza e emigracionit arriti pikun dhe ka theksuar se një gjë e tillë nuk do të ndodhë as në vitin 2018. Në këtë mënyrë, ai ka dalë kundër idesë së promovuar pak ditë më parë nga kancelari austriak Sebastian Kurz pak ditë më parë. /abcnews.al