julian assange

assange-1-1280x853.jpg
nev ila23:10 | 14/06/2019

Vendimi për ekstradimin në Shtetet e Bashkuara të themeluesit të Wikiliks Julian Asangge do të merret vitin e ardhshëm. Një gjykatë në Londër ka vendosur që procesi gjyqësor të nisë në shkurt të 2020-s dhe do të zgjasë 5 seanca.

Një gjykatë në Londër vendosi të premten se procesi për esktradimin në Shtetet e Bashkuara të themeluesit të Uikiliks, Xhulian Asanzh do të nisë vitin e ardhshëm. Gjyqtarja Ema Arbuthnot vendosi që procesi të mbahet më 25 shkurt dhe do të zgjasë 5 ditë, me seanca të plota.

u hap pasi ministri i Brendshëm britanik, Sajid Xhavit pranoi kërkesën e Shteteve të Bashkuara për ekstradimin e Asanzh, duke i hapur kështu rrugë nisjes së procesit. Ekipi ligjor që përfaqëson Xhulian Asanzh e quajti këtë lëvizje një “sulm agresiv ndaj të drejtave të gazetarisë”.

Ndërsa vetë Asanzh, përmes një video-konference iu përgjigj me ironi gjyqtares duke i thënë se në lojë janë 175 vjet të jetës së tij, që është dhe numri i viteve të burgut që ai rrezikon nëse deportohet në Amerikë, ku akuzohet për spiunazh. Asanzh mbrojti sërish faqen e tij të internetit nga akuzat për hakerim, duke thënë se Uikiliks është vetëm një faqe që publikon të dhëna.

Mark Samers, përfaqësues i Asanzh, i tha gjykatës se ekstradimi përmban një seri çështjesh të thella që duhen shqyrtuar. Por përfaqësuesi i Shteteve të Bashkuara, Ben Brendon tha se çështja lidhet me një nga rrjedhjet më të mëdha të informacioneve të klasifikuara në historinë e Shteteve të Bashkuara.

Dokumentet e publikuara kishin të bënin me sekrete të luftës në Irak e Afganistan, si dhe të shërbimeve inteligjente amerikane./ABC News Albania 24/7

4375.jpg
ad min21:31 | 03/06/2019

Një gjyqtar në Suedi u ka prerë shpresat prokurorëve që po hetojnë rastin e Julian Assange, duke komplikuar procedurat për ekstradimin e tij në vendin nordik. Një gjyqtar suedez ka refuzuar kërkesën e prokurorëve për të shpallur të arrestuar në mungesë themeluesin e Uikiliks Julian Assange, duke komplikuar kështu shpresat për ekstradimin e tij nga Mbretëria e Bashkuar.

Prokurorët deklaruan se Assange  nuk kishte bashkëpunuar me hetimin e tyre mbi dyshimet për agresion seksual dhe rrjedhimisht duhet të mbahet në arrest edhe në distancë me qëllim për t’u marrë në pyetje. Një arrest në mungesë do t’u kishte mundësuar atyre një hap përpara në kërkesën për ekstradim, por gjyqtari e refuzoi atë me argumentin se themeluesi i Uikiliks ndodhet i burgosur në Britaninë e Madhe.

Burgimi në mungesë është një procedurë normale në ligjin suedez, kur bëhet fjalë për një person që ndodhet jashtë shtetit ose në arrati dhe i lejon akuzës të shpallë një urdhër-arrest ndërkombëtar për ta kthyer në Suedi. Sidoqoftë, zyrtarë të prokurorisë deklaruan se hetimi për agresion ndaj Assange

do të vazhdojë dhe madje mund të kërkohet një hetim në nivel evropian për ta marrë atë në pyetje. Assange kërkoi azil politik në ambasadën ekuadoriane në Londër 7 vjet më parë për të shmangur ekstradimin në Suedi. Prokurorët e vendit nordik rihapën hetimet në ngarkim të tij në maj, një muaj pasi ai u arrestua dhe u nxor nga ambasada./ABC News Albania 24/7

ASSANGE-PLANI-_ABC-M1-T1.mpg_snapshot_00.17-1280x712.jpg
ad min19:19 | 31/05/2019

Një ekspert i Kombeve të Bashkuara ka denoncuar se themeluesi i portalit të lajmeve Uikiliks, Julian Assange ndodhet nën presione të forta psikologjike dhe u ka bërë thirrje autoriteteve britanike që të mos e ekstradojnë atë në Shtetet e Bashkuara.

Ekspertë të OKB-së kanë deklaruar se themeluesi i Uikiliks, Julian Assange është ekspozuar për një periudhë të gjatë ndaj torturave psikologjike. Nils Melzer, nga Kombet e Bashkuara, i ka bërë thirrje autoriteteve në Britaninë e Madhe që të mos e ekstradojnë Assange, duke paralajmëruar se të drejtat e tij do të shkeleshin dhe se ai nuk është në gjendje t’u bëjë ballë gjyqeve.

Gjithashtu, Melzer ka akuzuar disa shtete demokratike se janë përpjekur që përmes dhunës psikologjike të thyejnë vullnetin e themeluesit të Uikiliks. Por sekretari britanik i Punëve të Jashtme, Jeremy Hant ka reaguar duke thënë se Assange zgjodhi t’i fshihej drejtësisë dhe jo të përballej me të.

Hant ka theksuar se, ekspertët e OKB-së duhet t’u lejojnë gjykatave britanike të bëjnë gjykimin e tyre pa ndërhyrë dhe pa ngritur akuza të rënda. Ndërsa një zëdhënës i Ministrisë britanike të Drejtësisë ka deklaruar gjithashtu se, Mbretëria e Bashkuar nuk ka marrë pjesë në tortura dhe se qeveria në tërësi nuk bie dakord me konstatimet e zotit Melzer sa i takon dhunës psikologjike ndaj Assange.

“Tek ne gjyqtarët janë të pavarur nga qeveria dhe kushdo që dënohet është i lirë ta apelojë vendimin”, ka thënë zëdhënësi.

Por përfaqësuesi i OKB-së ka deklaruar se liria e Asange është e barabartë me atë të një njeriu që noton me varkë gome në mes të peshkaqenëve. Aktualisht, themeluesi i Uikiliks po lufton ekstradimin në Shtetet e Bashkuara ku akuzohet për publikim të dokumenteve sekrete./ABC News Albania 24/7

ass-1280x641.jpg
ad min14:10 | 30/05/2019

Julian Assange është transferuar në spitalin e burgut në Mbretërinë e Bashkuar, pasi shëndeti i tij është përkeqësuar ndjeshëm ditët e fundit. Lajmi është konfirmuar nga WIKILEAKS me anë të një deklarate për media

Themeluesi i WIKILEAKS, Julian Assange është transferuar në spitalin e burgut në Belmarsh, në Mbretërinë e Bashkuar, ku qëndron prej muajit të kaluar. Lajmi është publikuar nga WIKILEAKS, që në një deklaratë për media u shpreh shumë e shqetësuar për kushtet e tij shëndetësore. Julian Assange 47 vjeç po vuan dënimin pej 50 javësh në burgun e Mbretërisë së Bashkuar, pasi u shpall fajtor për shkeljen e rregullave të lirisë me kusht në vitin 2012; pasi u strehua në ambasadën e Ekuadorit në Londër.

Ai qëndroi në selinë diplomatike deri në muajin prill të këtij viti për  të shmangur ekstradimin në Suedi ku akuzohet për përdhunim. WIKILEAKS raporton se kushtet shëndetësore të Assange ishin përkeqësuar shumë pas shtatë vitesh të kaluar në ambasadën ekuadoriane, në kushte që nuk përputhen me të drejtat themelore të njeriut.

Gjatë qëndrimit në burg në Britaninë e madhe, shëndeti i tij është përkeqësuar dhe më shumë dhe ka humbur peshë, kjo është dhe arsyeja që autoritetet e burgut vendosën ta transferojnë në spital.

Pikërisht të enjten Assange duhej të kishte ndërhyrë për me anë të një video-konference në seancën e gjyqit për kërkesën  ekstradimit të prezantuar nga Shtetet e Bashkuara të Amerikës që kanë ngritur 17 akuza ndaj tij. Një prej akuzave është dhe spiunazhi për publikimin e dokumenteve sekrete diplomatike dhe ushtarake në vitin 2010./ABC News Albania 24/7

assange-1-1280x853.jpg
ad min14:08 | 01/05/2019

Është dënuar me 50 javë burg nga Gjykata e Londrës, bashkëthemeluesi i Uikiliks Julian Assange. Ai shpall fajtor për shkelje të lirisë me kusht pasi gjykata ekuadoriane në Britaninë e Madhe i hoqi të drejtën e azilit.

Julian Assange u ka treguar prangat në duar fotografëve të mbledhur para Gjykatës së Londrës. Bashkëthemeluesi I Uikiliks u dënua me 50 javë burg, pasi u shpall fajtor për shkelje të lirisë me kusht.

47-vjecari kreu këtë shkelje ligjore në momentin që ambasada e Ekuadorit në Britaninë e Madhe tërhoqi të drejtën e azilit, duke lejuar policinë britanike që ta arrestonte. Ai u strehua në ambasadën në Londër në vitin 2012 për të shmangur ekstradimin në Suedi ku akuzohet për ngacmim seksual, akuza që ai i mohon.

Në një letër drejtuar gjykatës Assange shprehej se po përballej me rrethana të vështira. Ai u kërkoi falje atyre që mund të mos i kishte treguar respekt, duke shtuar se në atë kohë, ai ka bërë atë që e ka menduar si më të mirë dhe të vetmen që mund të bënte.

Teksa po shoqërohej në qeli, ai përshëndeti njerëzit që ishin mbledhur për ta mbështetur.

Britania e Madhe do të vendosë nëse do të ekstradojë ose jo Assange në Shtetet e Bashkuara të Amerikës, ku ai do të përballet me akuzën e rrezikimit të sigurisë kombëtare amerikane. Kjo pas publikimit në Uikiliks të dokumenteve sekrete ushtarake që i ishin dhënë nga ish-anëtari shërbimit amerikan të inteligjencës Çelsi Mening.

Aktualisht më shumë se 70 deputetë britanikë i kanë dërguar një letër sekretarisë së shtetit, me anë të së cilës kërkohet ekstradimi i Assange nëse autoritetet suedeze do e kërkojnë një gjë të tillë./abcnews.al

assange-1-1280x853.jpg
ad min15:31 | 15/04/2019

Julian Assange e përdori statusin e azilantit në ambasadën e Ekuadorit për të kryer aktivitete spiunazhi. Kjo, sipas presidentit të vendit amerikano-jugor ka qenë dhe arsyeja përse themeluesi i Wikileaks u dorëzua tek autoritetet britanike.

Themeluesi i Wikileaks, Julian Asange e përdori ambasadën e Ekuadorit në Londër për aktivitete spiunazhi. Kështu ka deklaruar presidenti i vendit latin, Lenin Moreno, sipas të cilit edhe heqja e statusit të azilantit erdhi pikërisht për shkak të aktiviteteve ilegale të bëra nga 57-vjeçari.

Duke folur për të përditshmen “The Guardian”, Moreno bëri me dije se qeveria e mëparshme e Ekuadorit kishte ngritur brenda ambasadës struktura për t’u ndërlidhur me shtete të tjera dhe kjo sipas tij u keqpërdor nga Asange.

Presidenti ekuadorian tha gjithashtu se, vendi i tij nuk mund të lejonte një aktivitet të tillë pasi është një vend sovran që nuk ndërhyn në çështjet e shteteve të tjera.

“Nuk mund të lejojmë që shtëpia jonë, një shtëpi që hapi dyert, të kthehet në qendër spiunazhi”, deklaroi Moreno.

Presidenti i Ekuadorit citoi si shkak për heqjen e statusit të azilkërkuesit edhe gjendjen e rëndë higjenike në të cilën Assange jetonte brenda ambasadës. Por avokatja e themeluesit të Wikileaks, Jennifer Robinson i kontestoi deklaratat e Moreno duke i cilësuar ato si shpifje dashakeqe.

“Ekuadori ka sajuar disa shpifje dashakeqe në ditët e fundit për të justifikuar aktin e paligjshëm të lejimit të hyrjes së policisë britanike brenda në ambasadë”, deklaroi Robinson.

Avokatja shtoi se shqetësimet e Assange për ekstradimin në Shtetet e Bashkuara rezultuan të sakta, pas akuzave të ngritura për komplot me qëllim hakerimin e një kompjuteri të Pentagonit ku mbaheshin informacione të klasifikuara./abcnews.al

ASSANGE-PLANI-_ABC-M1-T1.mpg_snapshot_00.17-1280x712.jpg
ad min23:30 | 12/04/2019

Pas arrestimit të Julian Assange, autoritetet suedeze paralajmërojnë hapjen e hetimeve ndaj themeluesit të Wikileaks, për akuzën e agresionit seksual. Ekstradimin e tij e kërkojnë edhe Shtetet e Bashkuara.

Themeluesi i Wikileaks, Julian Assange mund të përballet me një rihapje të hetimeve për dhunim seksual në Suedi. Assange, 47 vjeç, u arrestua ditën e enjte pas 7 vjet strehim në Ambasadën e Ekuadorit në Londër.

Prokurorët suedezë deklarojnë se po ekzaminojnë çështjen me kërkesë të avokatit të viktimës së dhunimit. Avokatja suedeze Elizabeth Masi Fric ka deklaruar se do të bëjë gjithçka që hetimet në vendin nordik të hapen sërish. Assange aludohet ta ketë kryer dhunimin në vitin 2010 në Stockholm, ku do të mbante një fjalim para studentëve në lidhje me portalin e tij Wikileaks.

Vetë ai i ka mohuar gjithmonë akuzat duke deklaruar se marrëdhënia seksuale kishte qenë konsensuale. Prokurorët suedezë e mbyllën hetimin ndaj tij në vitin 2017 pasi nuk arritën ta procedonin 47-vjeçarin, që ndërkohë ishte strehuar në ambasadën ekuadoriane.

Por tani ata do të riekzaminojnë çështjen për të vendosur nëse do ta rifillojnë procesin dhe për këtë do të kenë afat deri në vitin 2020. Ndërkohë, edhe Shtetet e Bashkuara dëshirojnë ta ekstradojnë atë nga Britania në lidhje me rolin e luajtur në publikimin e informacioneve konfidenciale qeveritare në vitin 2010.

Në rast ekstradimi në Amerikë, ai rrezikon të dënohet me 5 vjet burg, por avokatët e tij druhen se mund të vuajë shumë më tepër./abcnews.al

assange-1280x720.jpg
ad min18:38 | 11/04/2019

Kush është Julian Assange, njeriu që me uebsajtin e tij tronditi themelet e diplomacisë amerikane?  

Për mbështetësit e tij, Julian Assange është një prijës i fushatës për të vërtetën. Për kritikët, ai është vetëm një person që kërkon të jetë në qendër të vëmendjes e që ka vënë në rrezik jetë njerëzish, duke publikuar në masë të madhe materiale të rëndësishme. Asange përshkruhet nga njerëzit që kanë punuar me të si një njeri energjitik dhe jashtëzakonisht inteligjent, i pajisur me një aftësi fantastike për të zbërthyer kodet e kompjuterëve.

Vetë ai nuk para ka folur për prejardhjen e tij, por media të shumta pas publikimit të Wikileaks janë interesuar për të. Assange lindi në Townsville të Australisë në vitin 1971 dhe kaloi një fëmijëri në zhvendosje të vazhdueshme për shkak se prindërit e tij menaxhonin një teatër lëvizës. Ai u bë baba në moshën 18-vjeçare dhe menjëherë më pas nisi betejat ligjore për kujdesin e fëmijës.

Zhvillimi i internetit i dha një shans për të përdorur aftësitë e tij në matematikë, edhe pse edhe këtu hasi vështirësi. Në vitin 1995, Assange u akuzua bashkë me një shokun e tij për një seri aktivitetesh hakerimi. Edhe pse grupi i piratëve informatikë ishte në gjendje të gjurmonte detektivët që u ishin vënë pas, Assange u arrestua dhe në gjyq u vetëdeklarua fajtor.

Ai u gjobit rëndë, por i shpëtoi burgut me kushtin e vetëm që të mos përsëriste krimet që kishte kryer. Më pas Assange kaloi një periudhë të gjatë akademike, i fokusuar në matematikë dhe fizikë. Kolegët me të cilët ka punuar e përshkruajnë atë si një gjeni që dallonte në çdo drejtim dhe që ishte shumë i dhënë pas konceptit të etikës, drejtësisë dhe atyre çfarë qeveritë nuk duhet të bëjnë.

Ai e ngriti portalin Wikileaks, që publikon dokumente konfidenciale të administratës amerikane, në vitin 2006, por do të ishte në Prill të vitit 2010 që ai do të pushtonte faqet e para të gazetave, kur publikoi pamjet e ushtarëve amerikanë që qëllonin për vdekje 18 civilë në Irak. Ai e promovoi dhe e mbrojti videon, ashtu sikurse bëri me publikimin e materialeve të klasifikuara të ushtrisë amerikanë në Afganistan dhe Irak, në Korrik dhe Tetor të të njëjtit vit.

Gjithashtu, faqja denoncuese e internetit arriti kulmin kur publikoi një seri dokumentesh, përfshirë 5 milionë email-e konfidenciale të agjencisë amerikane të inteligjencës Strefor. Por më vonë gjatë të njëjtit vit, ai u ndalua në Mbretërinë e Bashkuar, pasi autoritetet në Suedi shpallën një urdhër-arrest ndërkombëtar nën akuzën e agresionit seksual.

Pala suedeze donte ta merrte në pyetje në lidhje me dyshimet se ai kishte përdhunuar një grua dhe ngacmuar seksualisht një tjetër në Gusht të vitit 2010, teksa po vizitonte Stokolmin për të mbajtur një fjalim para studentëve. Vetë Assange ka deklaruar disa herë se në të dyja rastet kontaktet kanë qenë konsensuale, por megjithatë beteja ligjore që nisi e detyroi atë të strehohej në ambasadën e Ekuadorit në Londër për të shmangur ekstradimin.

Pasi kaloi thuajse 7 vjet brenda ambasadës, Assange u arrestua nga policia britanike më 11 Prill 2019, pasi presidenti ekuadorian Lenin Moreno bëri me dije se vendi i tij kishte vendosur t’i hiqte statusin e azilantit. Themeluesi i Wikileaks kishte argumentuar disa herë se nuk mund ta linte ambasadën për shkak se i druhej ekstradimit nga Suedia në Shtetet e Bashkuara, por oficerët e ambasadës i shpërfillën pretendimet e tij dhe e dorëzuan në policinë e Londrës./abcnews.al

ASSANGE-PLANI-_ABC-M1-T1.mpg_snapshot_00.17-1280x712.jpg
ent ela13:07 | 11/04/2019

Arrestohet në Londër themeluesi i Uikiliks, Julian Asanzh. Policia britanike e prangosi në ambasadën e Ekuadorit menjëherë pasi autoritetet e shtetit amerikanojugor i hoqën të drejtën e azilit.

Julian Assange, një nga themeluesit e Uikileaks, është arrestuar në Londër në ambasadën e Ekuadorit ku jetonte si refugjat që nga viti 2012 për të shmangur ekstradimin. Lajmi është konfirmuar nga Skotland Jard. Qeveria ekuadoriane i ka hequr të drejtën e azilit.

Asanzh nuk doli nga ambasada në Londër: ishte ambasadori ai që lejoi policinë britanike të hynte në selinë diplomatike ku themeluesi I Uikiliks u arrestua. Menjëherë pas arrestimit, Uikiliks akzuoi vendin amerikanojugor se kishte hequr në mënyrë të paligjshme azilin duke shkelur të drejtën ndërkombëtare.

Moska ishte ndër të parat vende që reaguan duke kërkuar që të respektohen të drejtat e Asanzh. Zëdhënësi i presidencës ruse DImitri Peskov u shpreh se në Mbretërinë e Bashkuar dora e demokracisë kishte mbytur lirinë.

Presidenti i Ekuadorit Lenin Moreno shpjegoi se i kishte hequr të drejtën e azilit Asanzh pasi kishte shkelur konventën ndërkombëtare. Ai kërkohej nga drejtësia britanike që nga viti 2012 pasi kishte shkelur rregullat e lirisë me kusht pasi u arrestua në Londër për dhunë seksuale, ndërsa në Suedi për përdhunim.

Ministri i Brendshëm britanik konfirmoi arrestimin e tij duke shtuar se pas shtatë vjetësh pasi kishte hyrë në ambasadën ekuadoriane tashmë ai do të përballet me akuzat, sepse askush nuk është mbi ligjin

Asanzh ishte strehuar në ambasadën e Ekuadorit në Londër në qershor të vitit 2012 duke marrë dhe nënshtetësinë në 2018-ën. Marrëdhëniet e tij me autoritetet ekuadoriane u tensionuan gradualisht, sa që në vitin 2016 atij I ishte mohuar përdorimi i internetit, pasi Uikiliks kishte publikuar një seri e-mail-esh të rezervuara të kandidates së atëhershme për në shtëpinë e Bardhë, Hilari Klinton.

Assange ka deklaruar gjithnjë se është i pafajshëm ndaj akuzave për përdhunim dhe abuzime sekskuale, por frikësohet se mos Londra e ekstradon në Shtetet e Bashkuara të Amerikës për shkak të publikimit të dokumenteve të rezervuara të Departamentit Amerikan të Shtetit. Një ekstradim që deri tani Uashingtoni nuk e ka kërkuar asnjëherë zyrtarisht. /abcnews.al

assange.jpg
ent ela20:45 | 05/04/2019

Themeluesi i Uikiliks Julian Asanzh, brenda pak orësh mund të dëbohet nga ambasada e Ekuadorit në Londër, ku jeton prej shtatë vitesh. Arsyeja është publikimi nga ana e Uikiliks, i llogarive sekrete bankare të presidentit të Ekuadorit.

Me anë të një mesazhi në Twitter, Uikiliks shkruan se themeluesi i tij, Julian Assange, do të dëbohet nga Ambasada e Ekuadorit në Londër, ku jeton pothuaj prej shtatë vjetësh. Sipas Uikiliks dëbimi pritet të ndodhë brenda pak orësh.

Shkak për këtë vendim është publikimi në 25 mars në “INA Papers“, një seri dokumentesh që vërtetojnë llogaritë sekrete bankare të presidentit të Ekuadorit Lenin Moreno, në vende të cilësuara si parajsa fiskale. Ditët e fundit Moreno akuzoi Asanzh se kishte shkelur në mënyrë të përsëritur rregullat e azilit. Uikiliks pretendon se Ekuadori ka arritur një marrëveshje me mbretërinë e bashkuar për arrestimin e Asanzh.

Në vitin 2010 një gjykatë suedeze, kërkoi arrestimin e Asanzh për tre akuza përdhunimi dhe ngacmime seksuale. Por në vitin 2017 cështja u mbyll.

Ndaj tij mbetet në fuqi mandati i arrestit nga policia e Londrës. Në vitin 2010 ai arrestua nga policia britanike si pasojë e një mandat-arresti evropian dhe ndërkombëtar nga ana e Interpol, me kërkesë të autoriteteve suedeze. Por pasi u lirua me kusht ai u arratis.

Në vitin 2012 ai kërkoi dhe përfitoi azilin politik në Ambasadën e Ekuadorit pasi i frikësohej ekstradimit në Shtetet e Bashkuara të Amerikës. Kjo pasi ka publikuar nëpërmjet Uikiliks dokumente sekrete amerikane./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono