Ministria e Brendshme ka hartuar disa ndryshime në ligjin për shtetësinë, që i lejon të huajt të pajisen me shtetësinë shqiptare.
Një prej tyre, sipas relacionit ka të bëjë me fëmijët e porsalindur. Ata mund ta marrin shtetësinë shqiptare menjëherë vetëm me pëlqimin e të dy prondërve dhe pa pritur të mbushin moshën 18 vjeç, siç ka qenë deri më tani.
Në relacion, citohet se për shtetasin e huaj që nuk ka mbushur moshën 18 vjeç, shtetësia shqiptare mund të fitohet vetëm me pëlqimin e prindërve, ose kujdestarit ligjor. Ndryshe nga më herët, shtetësinë shqiptare me ndryshime e reja të propozuara nga ministria, të huajt mund ta përfitojnë edhe nëse nuk zotërojnë njohuri të gjuhës shqipe, të folur e të shkruar, të vërtetuar nga institucioni përkatës arsimor, si dhe njohuritë bazë të historisë së Republikës së Shqipërisë.
Një tjetër ndryshim është edhe heqja e kriterit kufizues të moshës 18 vjeç për përfitimin e shtetësisë shqiptare. Kjo do të bëhet e mundur kur personi që kërkon të marrë shtetësinë në vendin tonë nuk përbën kërcënim për rendin publik dhe sigurinë kombëtare në Shqipëri. Por edhe në rastet kur Republika e Shqipërisë ka interes kombëtar apo interes në fushën e arsimit, shkencës, artit, kulturës, ekonomisë dhe sportit.
Një ndër propozuesit kryesor të ndryshimeve ligjore është Federata Shqiptare e Futbollit. Sipas rregulloreve të FIFA-s dhe UEFA-s aktivizimi i sportistëve nën emrin dhe logon e kombëtares së shtetit Shqiptar kërkon në mënyrë taksative që këta sportistë të kenë shtetësinë dhe pasaportën Shqiptare. Për këtë arsye, në rastet kur FSHF-ja evidenton talente të spikatura të sportistëve të huaj ose me origjinë Shqiptare (Kosovë, Maqedoni e Veriut, Preshevë), të vendeve të rajonit e më gjerë, lind nevoja e fillimit të procedurave për aplikim të fitimit të shtetësisë shqiptare për këta sportistë të huaj.
FSHF është e mendimit se vendosja e kriterit “që të ketë mbushur moshën 18 vjeç”, sjell një kufizim të madh në drejtimin e kërkimit dhe zbulimit të talenteve të reja, jo me shtetësi shqiptare, për dhënien e kontributit të tyre në skuadrat e kombëtares shqiptare. Të gjitha këto propozime janë dërguar për konsultim publik. Projektligji pritt të diskutohet nga deputetët në komisionet parlamentare deri në votimin e plotë të tij në seancë plenare.
