Kryeministri Edi Rama mesditën e kësaj të enjte ka qenë në Spitallë në Durrës ku ka inspektuar nga afër punimet për rehabilitimin e lagjeve në këtë zonë.
Rama gjatë inspektimit është ulur në një kafe bashkë me qytetarët ku ka diskutuar nga afër në lidhje me problematikat dhe me punimet që po zhvillohen në këtë zonë.
Kreu i qeverisë ka bërë batuta me qytetarët ku ka bërë thirrje dhe qytetarëve demokratë që të ulen në kafe.
“Kujdes se janë të rrezikshëm. U thuaj dhe atyre demokratëve të vijnë se ato dallohen dy orë larg që janë demokratë. Hajdeni mos u fshihni. U bëra 20 vite unë i njoh nga larg tashmë”, është shprehur Rama.
Ndër të tjera Rama ka ironizuar palën kundërshtare duke theksuar se tashmë janë në gjendjen që tu japësh dhe kafe.
Kreu i qeverisë ka dhënë detaje edhe në lidhje përsa i përket zhvillimeve në zonë, ku theksin e ka vënë tek ndërtimi i shkollave dhe hapësirave për fëmijët.
“Me sistemimin e lagjes së re dhe të infrastrukturës do të nisim dhe me projektimin e shkollave për të bërë të mundur që të jenë sa më afër komunitetit. Me këto investime do të kemi edhe turistë të shumtë, të cilët përveç hoteleve do të qëndrojnë edhe në shtëpi. Me investimet tashmë do i rritet vlera pronës në këtë zonë”, ka thënë Rama./abcnews.al
