Loading ...
Që nuk rreshtin së fituari, këtë e dimë. Gjithsesi, Bajerni ishte shumë pranë dështimit këtë herë në Bundesligë, një dështim që nuk do t’i prishte aspak punë për kampionatin të cilin e ka fituar, por thjesht për të mos arritur rekordet.
Kampionia e Gjermanisë, që e siguroi titullin javën e kaluar, luajti me të rinjtë ndeshjen në fushën e Maincit, pasi trajneri Vinsent Kompani vendosi të ruante titullarët për ndeshjen e Championsit ndaj Paris SG.
Në formacion ishin të tillë si Urbig, Ito, Laimer, Sapoko-Ndiaje, Gerrero dhe Xhekson. Papritur Mainci vendas arriti në avantazhin 3-0 në pjesën e parë falë golave nga Kor, Nebel dhe Beker.
Nëse nuk do të ishte fjala për Bundesligën, shumëkush do të mendonte se kjo ishte një ndeshje e manipuluar. Tekniku bavarez u detyrua të ndryshonte pas pushimit pasi eksperimenti I tij me të rinjtë dështoi.
Në fushë u hodhën yjet Harri Kejn, Musiala, Olise apo Tah. Përmbysja nisi shpejt dhe u arrit shtatë minuta para fundit.
Autorë të golave ishin Nikolas Xhekson, Olise, Musiala dhe pikërisht Kejn. Kapiteni I Anglisë ka më shumë gola se të gjithë në 5 ligat kryesore të Europës, 32.
Bajerni që ka thyer rekordin e golave në kampionat, pritet të barazojë rekordin e pikëve, 91, vendosur në 2013 nga skuadra e madhe bavareze e trajnerit Jup Hajnkes.
