Kreu i Partisë Demokratike Lulzim Basha gjatë vizitës së tij në Londër, zhvilloi të premten një takim edhe me komunitetin shqiptar që jeton prej vitesh atje. Basha ka përsëritur qëndrimin e palëkundur të opozitës së bashkuar se zgjedhje më 30 qershor me Ramën kryeministër, nuk do të ketë.
Për herë të parë Basha ka rrëfyer, se kur ishte ministër i jashtëm i është propozuar nga serbët ndryshimi i kufijve.
“Kanë ardhur, në atë kohë, autoritetet serbe dhe më kanë paraqitur idenë e ndryshimit të kufijve të Kosovës. Këtë e di unë, e di udhëheqja aktuale e Kosovës, se i kam informuar, e dinë partnerët tanë nga Uashingtoni në Londër, nga Brukseli në Berlin.”
Kreu i PD tha se nuk e kishte menduar kurrë që një propozim të serbëve ta dëgjonte nga goja e lidershipit në Shqipëri e Kosovë.
“Kurrë nuk ma kishte marrë mendja se idetë që do të dëgjoja nga goja e Vuk Jeremiçit dhe Ivica Daçiç, do t’i dëgjoja më vonë si ide origjinale nga goja e Edi Ramës dhe e Hadhim Thaçit. Këtë nuk ma kishte marrë mendja kurrë!”, ka thënë Basha./ABC News Albania 24/7
