Loading ...
Nga skenat më prestigjioze të botës deri te krenaria për origjinën shqiptare, Albjon Gjorllaku është një nga emrat që po shkëlqen në baletin ndërkombëtar. I lindur në Londër, por me rrënjë shqiptare, ai e ka kthyer pasionin për baletin në një karrierë të jashtëzakonshme, duke u bërë pjesë e një prej kompanive më të njohura të baletit në botë, The National Ballet of Canada.
Për Albjonin, baleti nuk ishte një zgjedhje e rastësishme. Ishte një thirrje që e ndjeu që në fëmijëri dhe që me kalimin e viteve u shndërrua në mënyrë jetese. Ai beson se në këtë profesion talenti është vetëm pika e nisjes, ndërsa disiplina, durimi dhe dëshira e pandalshme për të mësuar janë çelësi i suksesit.
Një moment vendimtar në rrugëtimin e tij artistik ishte pranimi dhe diplomimi në The Royal Ballet School në vitin 2017. Pikërisht aty kuptoi se arti i baletit kërkon përsosmëri në çdo detaj dhe se çdo arritje ndërtohet me punë të përditshme dhe përkushtim të vazhdueshëm.
Pas diplomimit iu bashkua Orlando Ballet, ku interpretoi për dy vite, përpara se në vitin 2019 të pranonte sfidën e radhës në The National Ballet of Canada. Në vitin 2022 u promovua në Corps de Ballet, një arritje që, sipas tij, përfaqëson shpërblimin e shumë viteve sakrificë dhe pune intensive.
Edhe pse jeton dhe punon në Toronto, lidhja me Shqipërinë mbetet shumë e fortë. Albjoni e konsideron identitetin shqiptar një pasuri që e shoqëron në çdo skenë ku interpreton dhe një përgjegjësi për ta përfaqësuar vendin me dinjitet para publikut ndërkombëtar. Gjatë karrierës së tij ka interpretuar role të rëndësishme si Dhelpra në “Arrëthyesi”, Benvolio në “Romeo dhe Xhulieta”, në “Liqenin e mjellmave” dhe Sanço Panxha në “Don Kishoti”.
Për të, çdo personazh është një histori që merr jetë vetëm përmes lëvizjes, pasi baleti është arti ku emocionet flasin pa pasur nevojë për fjalë. Megjithëse publiku sheh vetëm elegancën, dritat e skenës dhe duartrokitjet, pas çdo shfaqjeje fshihen vite të tëra stërvitjeje, disipline, lodhjeje dhe sakrificash personale. Por pikërisht emocionet që të fal skena e bëjnë çdo përpjekje të vlefshme.
Albjoni beson se baleti është një gjuhë universale që bashkon njerëzit përtej kufijve, kulturave dhe gjuhëve. Për të, artisti ka misionin të krijojë emocione dhe të afrojë njerëzit përmes bukurisë së artit.
Edhe pse ka arritur në një nga skenat më prestigjioze të botës, ai nuk e konsideron suksesin si një pikë mbërritjeje. Synimi i tij është të vazhdojë të rritet artistikisht, të interpretojë role të reja të repertorit klasik dhe bashkëkohor dhe të dëshmojë se me punë, këmbëngulje dhe besim në vetvete, asnjë ëndërr nuk është shumë e madhe./abcnews.al
