Gjykata e Shkodrës ka dhënë masën e sigurisë “arrest në burg” për Arjon dhe Klisman Hasa, dy vëllezërit që akuzohen për vrasjen e Ramazan Matajt më 5 Janar fshatin Dragoç të Postribës.
Dy vëllezërit nuk kanë deklaruar asgjë në seancë. Avokati mbrojtës ka kërkuar masën e sigurisë “arrest shtëpie” për Klisman Hasaj ndërsa për Arjon Hasaj ‘arrest në burg’ pasi nga akt ekspertimi i kryer nga grupi hetimor ka rezultuar se organizator dhe autor i vrasjes ka qenë 29 vjeçari Arjon Hasaj.
Nga të dhënat e akt-ekspertimit balistik të përfunduara rezulton se e njëjta armë e gjetur në oborrin e shtëpisë, me të cilën është qëlluar për vdekje Ramazan Mataj. Gjithashtu janë zbërthyer edhe telefonat e Ramazan Mataj dhe Arjon Hasaj si dhe i Klisman Hasaj, ku ky i fundit rezulton të mos ketë dijeni për ngjarjen dhe planin e të vëllait.
Pranë gjykatës nuk kishte asnjë familjar të vëllezërve Hasaj, pasi mësohet se tashmë janë ngujuar nga frika e gjakmarrjes.
Në dëshminë e dhënë për Policinë e Shkodrës, Arjon Hasaj ka treguar se arsyeja pse e ka vrarë Ramazan Matajn ka qenë për shkak të një lidhje që viktima kishte me motrën e tij prej të paktën 6 vitesh dhe se ai i kishte prishur dy martesa asaj.
“Unë nuk jam kriminel, por për faj të Ramazan Mataj nuk kishim më asnjë mundësi të jetonim këtej. I kemi shkuar 6 muaj më parë, I kemi thënë motrën tonë e ke ndarë nga dy burra, na lër rehat se boll probleme kemi të shkaktuara prej teje. Ai jo vetëm që nuk ndaloi, por ka vazhduar edhe duke shpërndarë video të motrës sonë. Ne nuk kishim më fytyrë të dilnim nga shtëpia, nga turpi dhe rëndesa që na shkaktonte çdo ditë. Hapa para pak ditësh një instagram me profil të rremë ku fola dhe caktova takimin. Pasi e kam qëlluar e fshehra armën në oborrin e shtëpisë. As vëllai as babai nuk e dinin që unë do bëja vrasjes. Unë nuk jam kriminel, por Ramazan Mataj nuk ka lënë rehat të jetojmë.”
Ndërkohë, vëllai i autorit, 20 -vjeçari Klisman Hasaj nuk ka pranuar asnjë akuzë ndaj tij, duke thënë se nuk ka qenë në dijeni të veprimeve të vëllait dhe faktit që do kryente vrasje.
Mbi Arjon Hasajn rëndojnë akuzat për veprat penale “Vrasja me paramendim” dhe “Prodhimi dhe mbajtja pa leje e armëve, armëve shpërthyese dhe municionit luftarak”, ndërsa mbi Klisman Hasajn vepra penale “Sigurimi i kushteve dhe mjeteve materiale për të kryer vrasje”./abcnews.al
