Real Madrid, Barcelona dhe Juventusi janë tre klubet e vetme që nuk kanë hequr akoma dorë nga projekti i Super League. UEFA i kërcënoi me përjashtim nga kompeticionet evropiane dhe vendosi t’i gjobisë, por Gjykata e Madridit i ka thënë “stop” sanksioneve ndaj tre klubeve “rebele”, teksa ka pranuar kërkesën e formuluar nga themeluesit e turneut të ri.
Muajin e kaluar doli kundër qeverisë evropiane të futbollit edhe Ministria e Drejtësisë së Zvicrës, shtet ku ndodhen selitë e UEFA-s, që theksoi se nuk ka hapësira ligjore për të dënuar tre klubet.
Me anë të një komunikate zyrtare të përbashkët të publikuar në rrjetet sociale, dy klubet spanjolle dhe klubi italian shprehin kënaqësinë e tyre për vendimin e Gjykatës së Madridit, ndërsa bëjnë të ditur se nuk kanë hequr dorë nga European Super League.
“FC Barcelona, Juventus dhe Real Madrid CF e kanë pritur me kënaqësi vendimin Gjykatës së Madridit për të konfirmuar detyrimin e UEFA-s për të ndaluar veprimet e ndërmarra kundër klubeve themeluese të Super League të Evropës, duke përfshirë procedurat disiplinore kundër tre klubeve të nënshkruara dhe heqjen e ndëshkimeve dhe kufizimeve të vendosura ndaj nëntë klubeve të tjera për të shmangur procedurat disiplinore të UEFA-s.
Comunicato di Barcellona, Juventus e Real Madrid
➡️ https://t.co/KW8brVdOXQ pic.twitter.com/rg9ELFfxAR— JuventusFC (@juventusfc) July 30, 2021
Gjykata pranoi kërkesën e bërë nga themeluesit e Super League, hodhi poshtë apelin e UEFA-s dhe konfirmoi njoftimin për UEFA-n se, nëse kjo e fundit nuk pajtohet me vendimin, do të ketë gjoba dhe përgjegjësi penale. Rasti do të vlerësohet nga Gjykata Evropiane e Drejtësisë, e cila do të analizojë pozicionin monopol të UEFA-s mbi futbollin evropian.
Është detyra jonë kryesore të merremi me problemet serioze me të cilat përballet futbolli. UEFA është akredituar si ligjvënëse, operator ekskluziv dhe mbajtës i vetëm i njohur i të drejtave të garave evropiane, si dhe organizator. Ky pozicion monopolistik dhe konfliktual dëmton futbollin dhe konkurrencën. Siç është demonstruar mjaftueshëm, kontrollet financiare janë të papërshtatshme dhe janë aplikuar në mënyrë jo të duhur.
Ne jemi të lumtur që, tani e tutje, nuk do t’i nënshtrohemi më kërcënimeve aktuale të UEFA-s. Qëllimi ynë është të vazhdojmë zhvillimin e Projektit të Super League në një mënyrë konstruktive dhe bashkëpunuese, duke u mbështetur në kontributin e të gjithë aktorëve të futbollit: tifozëve, lojtarëve, trajnerëve, klubeve, ligave dhe federatave kombëtare dhe ndërkombëtare.
Ne jemi të vetëdijshëm se disa elementë të propozimit tonë mund të rishikohen dhe, natyrisht, mund të zbatohen përmes dialogut dhe konsensusit. Ne mbetemi të sigurt në suksesin e këtij projekti, i cili do të respektojë gjithmonë legjislacionin e Bashkimit Evropian“, lexohet në komunikatën e përbashkët të tre klubeve. /abcnews.al
