“Dua të fitoj Champions League me PSG, kjo është ëndrra ime e madhe“, deklaroi pak ditë më parë Kylian Mbappe, prononcim që qetësoi disi tifozët e ekipit francez. Gjithsesi, e ardhmja e sulmuesit 22-vjeçar me PSG (ka edhe një vit kontratë) është akoma në dyshim, teksa Real Madrid monitoron situatën.
Në lidhje me këtë temë ka folur Mauricio Pochettino për Le Parisien. “A më ka thënë Mbappe që nuk dëshiron të rinovojë me ne? Kemi pasur një bisedë private, por nuk kam ndërmend të zbuloj asgjë nga ato që folëm.
Ama, po ju them që nuk e kemi prekur këtë çështje, nuk ka ndodhur kurrë. Reali dhe Tottenham? Ka shumë zëra në lidhje me merkaton, ky është futbolli.
Shumë klube kanë ndryshuar trajnerët, por unë kam një raport të qetë me presidentin dhe Leonardon. Gjërat kanë qenë gjithmonë të qarta midis nesh“, deklaron trajneri argjentinas i PSG-së. /abcnews.al
