“Nuk i pëlqente që të na e sillte gocën në shtëpi”, këto janë të vetme fjalë që tha për “ABC” i ati të Lumturie Bicit të cilës bashkëshorti Qemal Bici, i mori jetën duke e vrarë me sopatë në dhomën e gjumit e më pas u vetëvar.
Familja Rruplli e mori trupin e pajetë të vajzës dhe e varrosi larg atij të autorit. Lumturia u varros në fshatin e saj të lindjes në Mravë të Librazhd Katundit.
Vëllai i saj mendon se Qemali e ka planifikuar vrasjen.
“Ai mund ta ketë planifikuar shumë kohë më parë. Gjithmonë ka qenë njëri i pijes, i varur nga alkooli. Ishte njeri i lokaleve dhe ndikohej nga fjalët e njerëve”, tregon ai.
Ai thotë se 56 vjeçari ishte konsumues i rregullt i alkoolit, ndikohej shumë nga thashethemet. E motra dhunohej shpesh por nuk divorcohej për hatër të fëmijëve.
“Motra për hatër të fëmijëve, ajo nuk u divorconte. Ne kemi qenë gjithmonë në krah të saj, por ajo nuk donte edhe pse i kemi thënë të largohej. Ne e dinim se çfarë mostre ishte”, thotë më tej ai.
Ndërsa daja, Bujar Asgjeta bën fajtor edhe policinë që nuk e mbrojti mbesën e tij. Sipas tij para disa vitesh ajo mori guximin të denoncojë bashkëshortin.
“Kujtoj një denoncim që bëri para disa vitesh, kur ai torturoi shumë rëndë saqë mbeti e shtrirë. Pas disa ditësh shkoi dhe e denoncoi në polici. Por polica nuk i dha urdhër mbrojtje për ta parandaluar këtë krim makabër”, u shpreh ai.
Krimi i rëndë ndodhi pasditen e së hënës në fshatin Dragostunjë të Librazhdit. Çifti kishin 4 fëmijë dy prej të cilëve jetonin në emigrim, një në Tiranë. Ndërsa i vogli që gjeti trupat e pajetë jetonte me ta në fshat./abcnews.al/
