Dhe pse Bashkia e Divjakës është duke bërë një investim me qëllim që të shmangë përmbytjet në dimër, banorët kanë penguar punimet. Ata thonë se hapja e një kanali kullues u ka ngushtuar rrugën dhe projekti nuk vlen.
Pastrimi i një kanali kullues ka përplasur banorët me bashkinë. Në Këmishtaj të Divjakës,projekti i bordit Kullues, nuk ka përfunduar.
Punimet kanë mbetur në mes, pas kundërshtimeve të shumta për ngushtimin e rrugës dhe hedhjes së dherave nëpër tokat e banorëve. Më tepër ata i tremben përmbytjeve në sezonin e dimrit, ndaj ky investim shihet si përkeqësim i situatës.
“Është zënë aty, përmbytemi ne. Është një kanal jo dy, atëherë shëmbe një hap një tjetër”.
Hapja e këtij kanali kullues , shihet ndryshe nga përfaqësuesit e bashkisë Divjakë. Administratori i njësisë Gradisht, Ariol Qose, thotë se banorët janë njohur me projektin.
Ariol Qose -Administrator i Njësisë Gradishtë: “Është në kuadër të pastrimit të kanaleve kulluese dhe ankesat janë të padrejta”.
Pothuajse në të gjitha lagjet e fshatrave në zonen e Këmishtes, kalojnë kanalet kulluese të ujërave të bardha. Një pjesë e tyre janë përzier me ujërat e zeza, për shkak të mungesës së kanalizimeve të mbuluara. Pjesa tjetër, është e bllokuar nga ndërtimet pa leje, të kryera gjatë 20 viteve të fundit. Në shumicën e rasteve, përmbytjet në këto zona janë shkaktuar nga mungesa e kanalizimeve, të cilat nëse nuk pastrohen në kohën e duhur, do të përsëriten situatat e përvitshme në përmbytjen e banesave dhe tokave bujqësore.
