27 mijë e 605 persona humbën jetën në Shqipëri në 2020-ën ose rreth 25.8% më shumë se një vit para. Më tepër ishin meshkuj sesa femra ndërsa shkaqet në pjesën më të madhe cilësohen natyrale.
Të dhënat vijnë nga Instituti i Statistikave i cili në ka publikuar raportin e fundit ku vdekjet analizohen sipas sëmundshmërisë. Vjet më shumë se gjysma e personave ose 52.2% sipas INSTAT kanë humbur jetën nga sëmundjet e qarkullimit të gjakut.
Problemet kronike të zemrës, ato të enëve të trurit dhe ishemitë që bëjnë pjesë në këtë grup sëmundjesh u rritën me 23. 2% krahasuar më 2019-ën. Simptomat, shenjat dhe sëmundjet e papërcaktuar mirë janë shkaku i dytë i vdekjeve në Shqipëri në vitin 2020 me 17% të rasteve.
Prej tyre vihet re një rritje e humbjeve të jetëve me 24.6% krahasuar me vitin paraardhës. 90% të rasteve sipas INSTAT i përkasin moshës mbi 70 vjeç dhe shkak specifik cilësohet “vdekja nga pleqëria”.
Tumoret zënë 13% të vdekjeve ndërsa sëmundjet e aparatit të frymëmarrjes ku bën pjesë dhe Covid 19 zënë 8.9% të humbjeve të jetëve.
Ky i fundit mban vendin e katërt në raportin e INSTAT si shkaku i vdekjeve një vit më parë ndonëse humbjet e jetëve prej sëmundjeve të aparatit të frymëmarrjes rezultojnë 4.5 herë më të larta se në vitin 2019.
Numri më i lartë i vdekjeve për 100 mijë banorë vitin që mbyllëm është regjistruar në qarkun e Gjirokastrës ndërsa më I ulëti në atë të Tiranës./ Abcnews.al
