Dita e Kupës së Shqipërisë. Sot mësohen ekipet finaliste, pas betejave që do të zhvillohen në Durrës dhe Shkodër. Teuta e ka përgatitur në heshtje duelin me Skënderbeun dhe kërkon të flasë në fushë, prej orës 16:00.
Trajneri Edi Martini kërkon impenjim maksimal nga skuadra e tij, edhe pse përballë kanë një ekip që lufton për mbijetesë. Korçarët kanë treguar se dinë të përballen me ekipet e forta. Fitoret me Kukësin e Partizanin, apo barazimi me Tiranën, është një tregues i qartë.
Kështu pritet një betejë edhe sot, edhe pse Teuta sigurisht është favorite për të shkuar në finale dhe për të mbrojtur trofeun e Kupës së Shqipërisë, që durrsakët e kanë fituar edhe sezonin e shkuar pasi mundën Tiranën.
Për duelin tjetër, mes Vllaznisë dhe Laçit, nuk ka nevojë për shumë komente. Dy skuadra që luftojnë për titull përballen edhe në gjysmëfinalet e Kupës së Shqipërisë. Për shkodranët kjo është sfida e parë e vërtetë në këtë kompeticion.
Kuqeblutë kanë kaluar deri në këtë fazë duke eliminuar skuadra të Kategorisë së Parë, kurse Laçit iu deshën 120 minuta dhe penalltitë për të eliminuar Partizanin. Dy ekipet janë përballur edhe në fundjavë në kampionat dhe tani në Shkodër duan t’i shkaktojnë Laçit humbjen e parë, që do të ishte e dhimbshme. /abcnews.al
