Donata Lepenica, avokatja e arrestuar të enjten pas dyshimeve për “korrupsion” do të hetohet në masën e sigurisë “arrest në burg”. Gjykata ka lënë të pandryshuar masën e sigururisë të marrë në mungesë për të, ndrsa ka liruar një prej të bashkëarrestuarve me të. Tre të dyshuarit kanë heshtur në sallën e gjyqit.
Gjykata për Krimet e Rënda ka lënë të pandryshuar masën e sigurisë “arrest në burg” të dhënë me herët në mungesë për avokaten Donata Lepenica. Ajo u arrestua të enjten, pasi dyshohet të jetë përfshirë në një aferë korruptive prej 2 mijë euro në Prokurorinë e Tiranës, me qëllim zbutjen e akuzës për një person të proceduar.
Avokatja Lepenica ka qëndruar e heshtur në sallën e gjyqit. Avokati i saj ka rezervuar të drejtën për të dhënë shpjegime në një moment tjetër procedurial, pasi të jenë njohur me të gjitha aktet e dosjes. Masa “arrest në burg” është lënë në fuqi edhe për të arrestuarin tjetër nga operacioni i koduar “Ndërmjetësi”, Yzeir Bala.
Ndërkohë gjykata ka vendosur lirimin nga burgu të bashkëshortes së tij, Megi Naksi. Ndonëse prokuroria kërkoi “arrest në burg”, gjykata vlerësoi për të masën “arrest shtëpie”. Edhe Bala e Naksi janë shfaqur të kursyer në pretendimet e tyre para gjykatës, duke pohuar se do të shprehen në një moment të dytë.
Afera korruptive ku dyshohet të jetë përfshirë avokatja Lepenica dhe dy të tjetët u zbulua nga përgjimet e kryera për llogari të një hetimi tjetër në Prokurorinë e Tiranës. Në një bisedë mes avokates dhe një personi të arrestuar për “shitje lëndësh narkotike”, ajo përmend emrin e prokurorit Përparim Hasa, aktualisht nën hetim për çështjen, duke thënë se e kishte rregulluar me të.
Oficerët e Krimeve kanë administruar edhe disa pamje filmike të kamerave të sigurisë në godinën e Prokurorisë së Tiranës për të verifikuar hyrje-daljet e avokatës në godinë, apo zyrën e prokurorit, apo edhe të personave të tjerë të arrestuar./abcnews.al
