Italia synon të kualifikohet sa më shpejt në Botërorin Katar 2022. Skuadra e Roberto Mancinit ndodhet në grupin C, ku bëjnë pjesë edhe Zvicra, Bullgaria, Irlanda e Veriut dhe Lituania.
Katër herë kampionët e botës fituan 2-0 takimin e parë kundër Irlandës së Veriut, ndërsa nesër (20:45) luajnë në Sofje përballë Bullgarisë, kundërshtar të cilin nuk e kanë mposhtur kurrë në transfertë.
Mbrojtësi i Juventusit, Leonardo Bonucci vlerëson forcën e grupit tek ekipi kundërshtar, teksa bën të ditur në konferencën për shtypin se Italia do të futet në fushë vetëm për tre pikë.
“Presim një Bullgari që do të reagojë pas humbjes me Zvicrën. E kemi të qartë që do të hasim vështirësi nesër, por ne duam të rikthehemi me tre pikë në shtëpi.
Pika më e fortë e ekipit kundërshtar? Kolektivi, por ne jemi gati të përballemi me ta. Duam të sigurojmë sa më shpejt të jetë e mundur kualifikimin në Botëror“, deklaroi mbrojtësi italian. /abcnews.al
