Ngas Juxhin Mustafaraj
Gjykata e Dibrës është ngarkuar të shqyrtojë dhe të jap vendim për dosjen 184. Çështje që për nga ndjeshmëria dhe pritshmëritë publike, tejkalon edhe vetë përmasat e një institucioni që ka në përbërje vetëm 4 prokurore dhe 3 gjyqtarë.
Haki Çenga përgjimet e dosjes 184 i ka dëgjuar nga televizioni, pa menduar se edhe ai vetë një ditë do të duhet të dëshmojë në gjykatë.
Kur socialistët dhe demokratët kishin nisur përballjen paraelektorale në Dibër, i pozicionuar djathtas, ai mësoi se djalit iu mohua ndihma ekonomike.
“Më kanë heq asistencën e djalit pse jam demokrat as nuk e kam votuar dhe as nuk kam ta votoj PS-në”, ka thënë ai.
Në gjykatë do të jap shpjegime për arsyet që drejtuesit e shërbimit social i hoqën ndihmën ekonomike.
“Unë sulmoj veprimin, pse jam demokrat, edhe unë jam shtetas shqiptar, edhe unë investoj si qytetar me taksat e mia, edhe unë jam dibranë. Ja kanë dhënë nga frika”.
Sot u paraqit si dëshmitar, por garanton se nuk do të mjaftohet me kaq.
“Unë jam palë e dëmtuar dhe do të bëj dhe një kallëzim penal kush do më zhdëmtojë mua tani”, ka thënë ndër të tjera qytetari.
Bindjet politike i mohuan ndihmën ekonomike edhe Mensur Sanxhaferrit.
“Ma hoqën ndihmën ekonomike vetëm se votoj djathtas.”
Kur zgjedhjet parlamentare të 2021 po afrojnë, ndihma ekonomike i është rikthyer sërish.
“Vetëm këtë muaj na është ofruar ndihma ekonomike, si një mënyrë për të na joshur të votojmë majtas”, shprehet ai.
Gjykata e Dibrës vendosi të shtyjë seancën e dytë për dosjen 184, pas kërkesës së avokatit të Partisë Demokratike për përjashtimin e gjyqtares. Në mesin e të pandehurve ka edhe ish-zyrtarë të lartë në Dibër, të dyshuar të përfshirë në vjedhjen e votave për zgjedhjet lokale të vitit 2016./abcnews.al
